FAQ di l’amministratore SPIP

Fiera à e Quistioni à prò di l’amministratore di SPIP

Principià

1. Mi pare chì da l’interfaccia, ùn abbia accessu à tutte e funziunalità. Eppuru sò amministratore...

Verificate puru chè vo site in modu interfaccia sana. Hè scritta in u screnu di u spaziu privatu in cima d’ogni pàgina. In modu interfaccia simplificata, venenu piatte tante funziunalità da rende l’adopru più sèmplice per i principianti.

2. Ùn ci a facciu micca à truvà i furmulari da pudè scambià certi paràmetri di cunfigurazione di SPIP

Sè vo site amministratore, accederete à i menù di cunfigurazione passendu u topu sopr’à "Paràmetri". Fate casu, bisogna ancu à cliccà nant’à st’icona per accede à i paràmetri di u vostru situ, cum’è u so tìtulu o l’indirizzu email di cuntattu.

Sguassà certi elementi

1. Cumu si sguassa un artìculu ?

Ùn artìculu ùn pò esse sguassatu direttamente, ma omu u pò ghjittà « à a rumènzula», andendu in u menù di scelta di u statutu di l’artìculu. L’artìculi ghjittati sò sguassati da veru, in autumàticu, à u capu di 24 ore ; cusì vi lascia appena di tempu in casu di gattiva manighjata.

2. Cumu si sguassa un dispacciu ?

Di listessa manera chè per l’artìculi (vede quì sopra), ùn pò esse sguassatu in dispacciu direttamente ; ma i dispacci rifiutati sò sguassati in autumàticu à u capu di listessu tempu (24 ore).

3. Cumu si sguassa una rùbbrica ?

Per esse sguassata, una rùbbrica deve esse viota (vale à dì ùn cuntene nè artìculi - fora chì in a rumènzula - nè sotturùbbriche). Tandu a rùbbrica pò esse sguassata, andendu in «u situ sanu», spalanchendu tutta l’arburatura finch’ella cumparisca a rùbbrica, è poi clicchendu nant’à « sguassà » à fiancu à quessa.

I vari tippi di navigazione

1. Cosa hè l’interessu di i segni ?

A navigazione naturale dentru a maiò parte di i siti hè quella imposta da e rùbbriche : omu ci navigheghja seguitendu u filu di l’assestu in arburatura creata per via di e rùbbriche, da fustu à ghjambone fin’à e rambelle...

I segni permettenu un altru modu di navigazione, indipendente è trasversu. À ogni artìculu si ponu accuppià parechji segni. Cusì pò fà omu cumparisce in u situ pùbblicu a lista di i segni accuppiati à un artìculu, poi a lista di l’altri artìculi accuppiati à ognunu di sti segni. A navigazione cusì definita ùn s’incalca più à qualchì àrburu, ma face da crucivia, assai più lìbera, è permette di move si «à saltichjera» versu à diritta o à manca.

Per riassume e diverse funziunalità :

-  ogni artìculu stà dentru à una sìngula rùbbrica ;
-  ponu esse incastrate e rùbbriche l’une dentru à l’altre à l’infinita (sotturùbbriche, etc.) ;
-  ponu esse accuppiate à ogni artìculu unepochi (manc’unu, unu, parechji) di segni ;
-  i segni ùn ponu micca esse incastrati l’uni dentru à l’altri.

Da esempiu d’adopru di i segni, omu puderà cunsultà u situ di u Monde diplomatique. Custì e rùbbriche definiscenu a struttura rìgida di u situ (cartulari, quaterni, carte, archivi urdinati cù a data...). I segni permettenu d’alleà l’artìculi chì trattanu di listessu tema ; sò assestati in dui gruppi, « sugetti » è « paesi ».

2. Ùn capiscu micca a sferenza frà segnu è mutore di ricerca. Serà listessu affare ?

Cù SPIP, segnu è mutore di ricerca sò dui affari ch’ùn anu nunda à chì vede (d’altronde pò omu disattivà u mutore di ricerca cunservendu i segni, è viciversa).

Usendu i segni, sò l’amministratori à definisce e relazioni trà i diversi artìculi, accuppiendu li listessi segni. Pò fà omu cumparisce sti segni in u situ pùbblicu, cù a lista di l’artìculi accuppiati à ognunu ; à ùn fà li micca cumparisce, i segni ùn ghjovanu à tantu affare. cusì ottene omu una navigazione «à saltichjera», indipendente di e rùbbriche, ma sempre à cura di l’amministratori.

U mutore di ricerca lancia ricerche secondu e dumande di u visitore nant’à qualsìasi tèrmine o gruppu di tèrmini. Di sicuru i segni sò robba cuntenuta in i campi tocchi da a ricerca, cum’è i diversi campi di l’artìculi (cappellu, testu, etc.). Cusì permette u mutore di ricerca di truvà infurmazioni, ma franchendu si di e navigazioni (da rùbbriche, da segni) definite da l’amministratori, chì i corci, averebbenu u so chì fà à pensà à tutti i tèrmini chì puderebbenu esse ricircati in un situ...

Per qualchì infurmazione più tècnica nant’à u mutore di ricerca, vede l’artìculu chì li hè cunsacratu in a guida di u webmaestru SPIP.

3. Ponu i segni ralentisce u mo situ ?

Mancu stampa.

4. È u mutore di ricerca, pò ralentisce u mo situ ?

Quessa pò ancu accade...

Autore tavamig Publié le : Mis à jour : 26/10/12

Traductions : عربي, català, corsu, Deutsch, English, Español, فارسى, français, italiano, Nederlands, Português, slovenčina, Türkçe, українська