Pou instalé SPIP
Si ou rogard bann zot sistèm, ou va vwar lé tré sinp po instalé SPIP : akoz ou la pa bzwin bann konésans téknik (PHP ou MySQL).
Ou sar konfigir out sit dirèkman an liny-la, sanm inn lintèrfas grafik sak lé tré sinp (ou lora pa bézwin sanz inn fisyé èk bann kod klèr kom fénwar !)
Astèr nou donn tout moun inn sèl vèrsyon do SPIP sak i pé sanz dann tan (ni kont pa tèrla bann vèrsyon-dévlopman). Inn group bann dalon i travay pou rann ali méyèr, somansa nou lé tré atansyoné pou lès ali rès sinp (nou vé pa ou sra pou rod an-o anba bann pou mèt inn « bwa-d-kod » po swany out lozisyèl o fé li mars èk tèl ou tèl lébèrzèr pa égsanp).
Lo sit piblik
Lo sit piblik ou sava kré sanm SPIP néna bann kalité swivan :
- inn lintèrfas lo wèbmèt i pé sanz kom sak i vé sank lé bézwin konèt ryin de plis si PHP ou byin MySQL ; lintérfas Spip i program an langaz HTML, ansamb kél nou la mét in langaz plito simp mém ; Spip i obliz pa ou fé in laranzaz rizid kom inn brans bwadfèr (ou byin kom phpNuke èk son présantasyon 3 kolonn byin koni).
- Spip i anserv in systèm « CACHE » pou sak paz litousèl : lo band paz lé kalkilé (ansanm lo linformasyon y ansort lo bazdodné) sakinn son koté, é anboutiké dann inn fisyé « CACHE » ; komsa lo servèr lé pa tro isé d’appels MySQL, é osi lo sit y kontinyé tourné kanminm lo bazdodné MYSQL la finn rand lam.
- Andann SPIP néna inn ti rodèr po la rosèrs. Li sort in sistèm lindéksasyon sanm bann mo.
Lastriktir out sit
Lastriktir inn sit SPIP lé fé èk inn yérarsi sa kom inn bardrin d-bann ribrik. Néna pa okinn limitasyon pou lo nomb bann ribrik : inn ribrik i pé anboutiké tout bann souribrik é sou-souribrik i vé. Zot sar fèr out sitwèb sanm lanbwtman bann ribrik é souribrik komsa minm.
Bann zartik
Bann zartik lé o kèr lo sistèm lapiblikasyon SPIP. I pé mèt lo nomb zartik ou vé dann nimport kèl ribrik zot la kréé. Ou pé minm dégaz zot bann zartik sinpman dann lo ribrik ou vé.
Pou ékri inn lartik, lé tré sinp. Zot i sar ansèrv inn lintèrfas grafik si lo wèb. Po zwinn lintèrfas-la ou sar ansèrv léspas privo bann zitilizatèr anrozistré do SPIP (ni sar ronir si lo sizé anba tèrla).
Dann inn lartik ou sar trouv plizyèr zéléman sak i donn ali son striktir dann SPIP : lo titr, lo sirtitr, lo soutitr, inn tite dékrisyon sak lartik i kontyin, lo sapo, lo kor lo tèks prinsipal, inn ti « post-scriptum » ni la aplé « Koz-déryèr ».
Lé trè fasil mèt anpaz inn lartik sanm SPIP. Lo sistèm néna bann rédyon-linprimri i permè azot mèt bann gro karaktèr, gatir wèb, bann not anba lapaz... Ek tout bann rédiyon-la, ékri inn lartik SPIP lé sinp kom in limèl.
Ek lintèrfas grafik ou pé osi sarzé fasilman bann zimaz é sakinn bann zartik i pé konèt son logo litousèl. Lé osi posib don inn ou plizyèr bann molaklé po sak lartik.
Ladat lamiz an liny i sort otomatikman (ou pé sanz ali kanminm si ou vé) ; ou pé minm zwind ali inn dézyèm dat si ou vé armont pa égsanp ladat lo promyé piblikasyon lartik (inn légsanp lé kom sa : si out lartik la sort inn promyé fwa dann inn zornal papyé).
Artourn inn lartik (bann zartik « fantom ») : SPIP i donn aou mwayinn fabriké bann zartik-fantom. Bann zartik-la, lé tout anboutiké dann lastriktir lo sit ; son kontni osi, li sava sort afisé dann bann ribrik kom tout bann zot zartik. Somansa, fransvérité, bann zartik-fantom lé sinpman inn kopi indé zartik ou va trouv anlèr si lo sitweb o inn ot sit parèy. Ladrès lapaz lartik lorizin, sa lé lo rédaktèr sak i sar présiz ali. Fonksyon-la i permè rann fasil lo sanzman inn sit sak léksit déza pou mèt ali dann inn nouvo sit SPIP.
Bann tit-nouvèl
Koté bann zartik, néna andann SPIP inn sistèm bann tit-nouvèl, i permè aou pibliyé indé tite zinformasyon byin takini, po fé inn tourlaprès pa égsanp (o indé tourlowèb).
Lé sèlman posib pibliyé bann tit-nouvèl andann bann ribrik prinsipal lo sitwèb, sédir tout banna lé plasé dann rasine lo sit (sa lé po permèt inn bon striktirasyon out sit).
Lé pa konpliké lastriktir bann tit-nouvèl-la : néna inn titr ék lo tèks-minm lo tit-nouvèl. Sakinn i pé osi afis inn gatir web anba lo tèks.
Po zéré lapiblikasyon bann tit-nouvèl, sa lé tré sinp osi : néna sèlman dé bouton pou apiyé : « pibliyé » o « arfisé ». Lé posib afisé sakinn tit-nouvèl èk inn limaz prop. E lo komandèr lo sit web i pé osi désidé dégréné litilizasyon tout bann tit-nouvèl.
Bann forom
Andann SPIP néna inn sistèm bann forom.
Ou pé kré bann forom-la sak i akost out bann zartik (inn forom po in lartik), out bann ribrik o bann tite-nouvèl. Lo webmèt i sra kav programé son linterfas fasilman po son sit i prézant sakin lartik èk son forom, o plisyèr bann lartik èk inn forom litousèl po lansanm...
SPIP i donn aou lo swa plisyèr kalité bann forom. Néna :
- bann « forom lib » : bann komisyon i afis lo mamn lé posté. bann forom-la lé modéré apré (ni apèl banna : bann forom modéré-déryèr). Bann komandèr i pé dégrèn tout bann modékri sak i poz pwoblèm.
- bann forom modèré-dovan ; bann komisyon i afis sèlman si lo sit aprè inn komandèr la apiyé azot.
- bann forom si labonman : tout moun i vé mèt ansanm dann forom-la i dwa inskri ali dabor. I dwa présizé son ladrès imèl po gigny inn modpass sak i permè ali ékri si lo forom si labonman.
Andan SPIP néna osi inn sistèm bann forom privé, po ban lotèr èk bann komandèr i pé kozé ansanm son dalon. Ou sar trouv tout bann forom-la andan léspas privé lo sit ("forom dodan" pou tout moun, "forom bann komandèr pou komandèr sèlman). sédir ifo ou lé anrozitré si lo sit po lir è lèt ansanm andan bann forom-la.
Bann fil-sinyatir
Sanm SPIP, lé trè fasil sanz inn lartik po fé inn « pétisyon » o « fil-sinyatir ». Ou pé azout in fil-bann-sinyatir (ni appèl ali « fil-sinyatir » pou lintèrfas privé) anba ou lartik.
Andan SPIP, tout bann sinyatir lé konfirmé sanm inn limèl otomatik : inn modékri po lakonfirmastyon lé anwayé lo moun sak la sinyé. Li pé dir alor si son sinyatir lé vré o si salé inn kouyonis inn ot mou la vouli fé ali. Li pé osi sanz son lavi.
Ou pé programé fasilman lo tip ban fil-sinyatir ou vé anserv. ou pé domman :
- kiswa inn sèl sinyatir po inn ladrès imèl ;
- kiswa in ladrès sitwèb (SPIP i sar rogard otomatikman si son ladrès URL lé bon) ;
- ou pé osi swazi si lé posib zwinn inndé modékri èk zot bann sinyatir.
Bann sifklé
Andan SPIP néna inn sistèm bann léstatistik (bann sifklé. I permé aou konèt lékèl bann zartik o lékèl bann ribrik out sit lé pli popilèr.
Bann lotèr/bann komandèr
Lé posib zéré tousèl son prop sitwèb SPIP (èk lo stati « komandèr » è wèbmèt). Lé osi posib inn bann dalon i mèt ansanm pou fé son sit.
Dann ka-la SPIP i donn azot dé nivo laksé si bann drwa lazéstyon lo sit :
- bann komandèr i pé okip lastriktir lo sit, lékritir é lakonfirmasyon bann zartik.
- bann lotèr i pé sèlman ékri son bann zartik o tit-nouvèl é propoz azot po lapiblikasyon.
Ou pé inskri kank bann lotèr èk bann komandèr ou vé. Néna okinn limit andan SPIP. Lé posib lotèr i inskri ali tousèl an liny (SPIP i sar zéré otomatikman). Sakinn lotèr èk komandèr i pé azout son prop logo (inn limaz, inn foto).I pé télésarz ali dopwi lintèrfas privé lo sit.
Lasindikasyon
Ek tout bann sit ou kré sanm SPIP, phpNuke, ou ban zot sistèm, néna inn « fisyé dinamik » sak i rannkont lo dernyé bann piblikasyon. SPIP lé kav lir banna fisyé. I pé indiké litousèl otomatikman kouk sa lé bann dèrnyé nouvèlté inndé zot sitwèb. Ni apèl alor bann sit-la : inndé « sitwèb sindiké ».
- Zot i pé azout kank sit sindiké i vé ;
- Bann sit sindiké lé zwinn èk out prop ribrik si out prop sit ; lé itil si ou vé, pa egsanp, mèt inn ribrik tématik èk bann gatiraz si bann zot sit i koz lo tèm-la.
Lintèrfas grafik lo sit piblik
Lintèrfas grafik lo sit piblik lé tré soup. sanm son langaz sinp (maziné po SPIP), lé posib fé kiswa lintèrfas grafik ou vé. Néna okinn bézwinn konèt PHP èk MySQL po fé son lintèrfas orizinal sanm SPIP.
Somansa lo sistèm kas (CACHE) néna andan SPIP lé kopatib èk tout PHP : lo wèbmet i pé aboutiké bann fonksyon PHP andan son ban léskélet (forma tip son bann pazwen SPIP) ou bann pasrèl CGI. Komsa lé posib azout andan SPIP tout bann skipt spésialisé sak i sar komplété désertin fonksyon ni la pa intégré (pa egsanp : in kontèr, inn rodèr pli pwisan, étousala...).
Lintèrfas lo sit privé
Andan léspas privé lo sit ou sar trouv inn ot lintèrfas grafik trè sinp po zéré lo kontni out sit è réglé désertin fonksyonalité (bann forom, bann lang, étousala...).
Lintèrfas-la y adap solon laktivité lo rédaktér ou byin l’administratèr, é osi solon l’aktivité lo sit mèm. Komsa sak lotèr y ariv vitman ansanm son bann lartik, tout bann zotèr i vwa tout bann zartik sak lé proposé. Parey, lo linterfas i sanz solonk ou lé komandèr ou simp rédaktèr.
Sakinn zitilizatèr i pé swazi bann kalité son prop lintèrfas. Néna lo swa ant inn lintèrfas sinp èk sèlman bann prinsipal fonksyon, é inn lintèrfas konplé. Sakinn moun i pé osi sanz lo koulèr lintèrfas grafik son léspas privé.
Kank néna plizyèr dalon si lo sit, SPIP lé inn zoutiy po mèt ansanm sanm inn travay kopératis : i pé kozé andan forom si inn lartik, mèn inn sobatkoz si lamanyir dzèré lakonfirmasyon, é minm argroup azot épi travay ansanm son bann dalon si lo minm tèks...
Réglaz si lo sitwèb
Andan SPIP lintèrfas grafik lo sit piblik é la zéstyon lo kontni lé byin séparé (pa egsanp, ou pé pa swazi lo koulèr lékran piblik sanm lépas privé). Somansa lé posib réglé désertinn laspé lo sit piblik andan léspas privé :
- asèpt ou arfiz désertinn zéléman lo kontni andan zartik : ou pé komsa intèrdi anservir ban sirtitr, soutitr, sapo ou koz-déryère (PS), ou ladat la piblikasyon davan ék bann molaklé ;
- konfigir (o dégrèn) bann forom piblik ;
- indik si ou vé piblyé out bann zartik avan in sertin dat ou la doné (swa-la i pèrmé aou bat karé pou out vakans, lo sit i sar pibliyé tousèl out bann zartik kank ou lé déor) ;
- dégrèn lo sistèm ban tit-nouvèl (si désertinn sitwèb lé pa itil ansèrv ali ; anlèv lo sistèm-la i sar rann pli sinp lintèrfas out bann dalon rédaktèr ) ;
- fé zwé o dégrènn tout bann sifklé ;
- fé zwé o dégrèn lo rodèr.
Lo swivi léditoryal
SPIP néna plizyèr tit fonksyon sak i rann fasil lo swivi léditoryal :
- lanvwa bann komisyon andan forom pou bann zotèr ; lotèr lartik-la i sar gany inn modékri kank indé vizitèr lora post son manyir dvwar anba lo tèks. Li sar gany inn limèl pou anons inn réaksyon. Lé itil pou lo swivi laktivité anba son lartik.
- lo swivi laktivité lo sit ; andan inn sit i roul èk inn group bann lotèr, ou pé armontr tout moun otomatikman sak néna inn nouvo lartik si lo sitwèb. Ou pé anvwa inn limèl pou fé inn lanons importan (sanm inn list difizyon) ; komsa minm, kank ou la pibliyé inn nouvo lartik, tout moun-la si lalist i pé konèt ali ;
- lanons bann nouvèlté ; SPIP i pé anvwa inn limèl otomatik po sinyalé tout bann dèrnyèr piblikasyon si lo sit. Bann komandèr i sra pou indiké lo frékans son lanvwa-la.
Lasovgard èk lésportasyon labazdodné
Lo wébmèt lo sit i pé fé zwé inn sovgard son bazdodné (inn fisyé lé alor kréé) ; si lo sèrvèr i pémé aou, sovgard-la i sra pou konservé si inn fisyé koprésé. Ek forma-la sra pli fasil aprésa pou rékipèr ali sanm FTP. Andan SPIP néna byin sir lo fonksyon prési sak i pérmé aou inporté inn fisyé sovgardé.