SPIP ? Kosa i lé ?

Inn sistèm pou pibliyé zot bann sitwèb

SPIP lé inn sistèm pou lapiblikasyon sitwèb si lintèrnèt. Kosa i lé ? Sa lé inn zé d-bann fisyé, zot i pé instal si zot kontwèb. SPIP i rann azot kav tir lo bénéfis bann zotomatism : zot y pé zèr azot sitwèb ansanm bann zamis ou group dalon azot ; ou pé sanzé zot lartik minm si zot i koné pa ryin èk zot HTML ; ou pé sanzé lorganizasyon zot sitwèb la... èk lo minm lozisyèl sak zot i prann po visit inn sitwèb (Netscape, Microsoft Explorer, Mozilla, Opera...), SPIP i rann azot kav fabriké, pibliyé ou sanzé tout kalité d-bann sitwèb. Ek son lintèrfas sinp zot i sava ansèrv ali fasilman.

Nana dot bann sistèm po lapiblikasyon si lo wèb ; sakin néna son kalité, son karaktèr. Koméla, PHPnuke lé byin konu (anon vwar lo sit an anglé, si zot i pé lir lalang-la) ; somansa son striktir lé pa soup : i prézant inn baro èk bann ti lartik. SPIP lé pli soup. Ni la tourn ali pou zot i pé kré in sitwèb byin striktiré, sak i louk inn zornal sa-minm : èk son bann rubrik, son bann sourubrik (é tousala pou swiv a lafil), tout bann manyir przéanté dann inn bon bardrin-sit ousa out bann zartik èk out bann tit nouvèl sra piblyé. Tout bann zinformasyon-la, lé posib konplèt azot, si zot vé, sanm bann forom kozman.

Akoz SPIP ?

SPIP lé in lozisyel nou vé akord azot sou lalisans lib :

SPIP kréol
Lo versyon do SPIP an kréol rényoné

Licence Publique Générale GNU(GNU Public General License ou GPL). Néna pwinn grann bézwin dot lozisyèl po ansèrv a SPIP. Zéfé lékipman lé rézonab. Néna minmm désèrtin zébèrzèr gratwi sak i étal pou zot tout bann zéfé néséser-la : PHP+MySQL (anon vwar tèrla-minm lafwar-bann-késtyon èk lo liv-linstalasyon sak i sar don aou bann présizyon sir tout bann zoutiy-la. Néna plis détay anler).

Ou sava trouv po télésarz SPIP gratwitman sir lo sitwèb uZine.

Néna lintéré ansèrv SPIP pou...

-  1. zèr inn sit kom inn zornal an liyn. Ni trouv lo ka si out sitwèb lé konstrwi sirtou sanm bann lartik èk bann tit-nouvèl sak lé fisé dann inn larborésans (sédir inn bardrin-d-sitwèb), sanm bann rubrik lindanlot. (Anon vwat lalistkonplé do bann kalié do SPIP si ou vé inn pé plis détay).

-  2. larg trwa kalité d-tas, sak ou sar kav partaz ant plizyèr moun :

  • lamanyir prézanté out sit grafikman ;
  • lamanyir mèt ansanm bann komisyon èk bann propozisyon déor pou bann zartik èk bann tit-nouvèl si lo sit ;
  • lamanyir zèr bann késtyon léditoryal pou lo sitwèb : sédir koman ou sava kadr inn lorganizasyon po bann rubrik, pou lakonfirmasyon pou bann zartik...).

-  3. libèr lo wèbmèt é son bann dalon sir lo sit : èk SPIP lé pa nésésèr sak tout bann moun i pibliy i koné désèrtin manyir sak lé kom kari margoz pou la piblikasyon sir lo wèb ou bann konésans tèknik sak lé lon pou aprann.

Ou sar instalé SPIP sanm inn lintèrfas sinp, è firamézir. Aprésa ou sra kav komans lakréasyon out bann rubrik èk bann zartik.

SPIP néna bann kalité-minm la...

Po (bann) lotèr èk (bann) komandèr

SPIP lé fransvérité inn vré manzé kwi po bann lotèr ék bann responsab(bann komandèr) inn sitwèb. Li prézant inn figirwèb "intwitiv", sak sava ansèrv fasilman sanm manipil ali. Figirwèb-la li pèrmé azot propoz vitman é sinpman zot bann zartik èk out bann tit-nouvèl. Li rann fasil la zéztyon lo sitwèb, èk son kalité léditoryal. Anplis, néna, dann SPIP, sak ni apèl bann rédiyon-limprimri i sar donn out tèks la form i vé, sank ou nora bézwin kozé HTML. Komsa lé fasil èkri si lo sit pou tout moun minm. Ek SPIP, lapiblikasyon out tèks lé osi sinp lékritir inn limèl.

Po lo wèbmèt

SPIP lé inn zoutiy sak i rann la vi lo wèbmèt, parèy inn manzé lièv...apré li la konpri koman SPIP i mars. Lakalité grafik èl la manyir bat-karé si lo sit, sa lé bann "skelèt" HTML i va donn aou. Skelèt-la lé kom inn forma kadré davans, sak i va donn aou inn vizyon bann paz lo sit (nora pa égsanp inn vizyon pou sakinn kalité d-dokiman : inn lèskélèt po lapaz lindèks, inn ot pou vwar inn rubrik èk lo rézimé kosa ou sar trouv dodan, inn ot ankor pou inn lartik o tit-nouvèl). Bann lèskélèt-la, ou pé kré azot fasilman èk sak ni apèl bann "sédo-tag" ou "kazi-tag", sédir bann boudkod kadré po SPIP, ou sar aprann vitman pou ansèrv si ou vé. Ou pé osi itiliz bann lèskélèt antyé ou sar trouv inn zé èk lo télézarzman lout versyon do SPIP banna lé déza instalé dann lozisyèl).

Akoz SPIP i pèrmé aou kré out prop lèskélèt kom sak i vé, li donn aou inndé larz libèrté aranz lakalité grafik out sit é lamanyir bat-karé si out bann paz. Ou pé zèr désèrtin zéléman lo sit èk SPIP minm (lé fé po sa...), ou pé mèt dot bann soz fémin dann out bann léskélèt (si ou lé kav kodé HTML, PHP, bann skrip é tout bann kozé linformatik kom-sa minm). Ou pé osi ansèrv inn ot sistèm po lapiblikasyon pou konplété out bann léskélèt (mé soman si banna lé toléran kom SPIP sa-minm). Ek SPIP, lo travay lo wèbmèt i pé èt inn vré travay marmay o inn travay larts. I sava dépann lo swa bann léskélèt (bann léskélèt sak lé livré èk SPIP, bann léskélèt fémin sirmézir)

Po bann vizitèr lo sit

SPIP néna inndé zavantaz po bann vizitèr osi. Dabor, li rann lo sit pli rapid. Akoz néna inn sistèm do kas si lespas piblik lo sit. Sistèm-la i pèrmé évité sak néna trod rokèt si la bazdodné. Lo kas-la i pèrmé protézé la bazdodné kont bann zaré-bloké (sak ou va trouv souvandfwa si bann sèrvèr tro "sarzé"). Ek lo kas SPIP, kanminm la baz la bloké, ou pé vwar lo sit an liyn. Somansa kontni sit-la, li pé pa sanzé zizka labaz i ropran son roulaz (bann forom minm, i pé pa bouz èk inn nouvèl komisyon zizka moman la).

Ek SPIP, lo vizitèr i pé rod kosa i vé si lo sit, gras inn "motèr" pou lo rodaz é lindéksasyon bann kontni. Ni apèl ali sinpman lo "rodèr SPIP" dann dokimatsyon-la.Rodèr-la, lo webmèt lo sit i dwa fé zwé ali pou pèrmèt bann vizitèr rod tout soz i vé dann l’ansanm lo kntni lo sit piblik (dann SPIP néna osi inn léspas privé, somansa lo rodèr i sar pa sers okinn soz dann léspas-la).

Kèk zinkovényan do SPIP

Akoz SPIP néna inn léspri soup, li néna osi désertinn kalité i pé parèt kom bann défo pou lo moun i komans son sit. Pa égsanp, èk SPIP lé nésésèr lo wèbmèt i aprann inn pé koman i sar sanz laprésantasyon sanswa pou bann léskélèt (sédir la présantasyon otomatik sak lé doné èk lo lozisyèl). Si lo wèbmèt i vé fé inn sit i arsanm kosa la maziné, li dwa konèt inn ti gouté do kazi-HTML (o "sédo-HTML, kom nou pé apèl ali). Kank lora apri ansèrv lo kozé SPIP, é si li koné déza inn gazon do HTML, li sra kav fé inn paz kom i vé (Kozé-la i vyin fasilman akoz lé kom pozé bann Légo pou fé inn kaz kank ou lé marmay. Dann komansman ou sé pa kosa i pé fé èk bann kub-la, aprèsa ou la manipil inn pé, i pé fé kosa la maziné : inn mir, inn kaz, inn ti moun, étousala.... Néna dot sistèm pou lapiblikasyon sitwèb, sak i rann aou kav sanm sanz bann koulèr lo paz èk inn sinp bouton ou sar apiyé. Sa lé lo ka lo sistèm phpNuke : lé fasil pou lo wébmèt fé inndé bann zaksyon kom-sa, somansa lé inn sistèm limité, i donn pa ou dot bon péd drwa pou sanz bann zot soz. Boudikont, tout bann sit fé sanm bann sistèm-la i rosanm linlot kom dé gout lo. Webmèt-la, néna pwin grann libertè. O-kontrèr, SPIP lé soup. Aprann ali, é fé kosa i vé èk lo figir grafik out sitwèb.

Si lo wèbmèt i vé pa aprann tousala, néna pwinn trod larlik kanminm, akoz SPIP lé doné èk inn ansanm konplé bann zintèrfas (sanswa) pou bat-karé toudswit si lo sit pibliyé (dann son figir piblik é privé). Kank ou lora komans ranpli out sit èk lo kontni ou vé pibliy an liyn, bann vizitèr i pé nir toudswit pou vwar. Lo sit i sar rosanm alor lo figir grafik sak lé doné otomatikamn.

Plitar, nou la prévi plisyèr zot présantasyon grafik pou doné èk la versyon ofisièl do SPIP. néna déza inndé skélet ou pé trouv sir lo sit SPIP-Contrib, i pèrmè bann wébmèt itiliz azot é roul inn manyir kaziman pérsonèl pou prézant zot sit, sanm inn ti péd zéfor sèlman.

Bann zégsanp

Lo promyé égsabp do sit SPIP lé lo wèbzin uZine2 (SPIP,lé pou dir vrélo kod sak la finn dèt maziné pou lo sit-la. aprésa, nou la désid donn ali pou tout moun é fè lo SPIP zénéral ou pé koméla télézarzé). Néna astèr in bon péd sit sou SPIP, kom lo sit lo zornal Le Monde diplomatique, mé osi Vacarme, lo sit linivèrsité La Sorbonne, ou lo Konsèy rézional La Rényon...Pou vwar inndé zot sit sou SPIP, anon rann aou sir lapaz-la :http://www.uzine.net/article884.html

Pou kontinyé

Si ou vé fé inn sit sou SPIP, anon lir la dokimantasyon, son bann zégsanp é tout bann "promyé pa" sak lé propozé dann rubrik tèrla minm. Ou va trouv osi bann listmèl pou kozé, pou giny bann konsèy, pou poz out bann késtyon é mèt azot ansanm antrozot, èk son léspéryans ou son rogar néf. Nartrouvé !

Portfolio

Lotèr : Pascale Publié le : Mis à jour : 05/10/22

Traductions : عربي, asturianu, български, brezhoneg, català, corsu, Kréol réyoné, Deutsch, English, Esperanto, Español, فارسى, français, galego, italiano, 日本語, Lëtzebuergesch, Nederlands, òc lengadocian, polski, Português, română, русский, slovenčina, Türkçe, українська