Kosa i lé bann zéléman SPIP i pé zéré ?

SPIP la dabor finn dèt dévlopé pou lo sit uZine2. Ni la pans ali po zèr inn sitwèb po inn wèbzin : sédir inn sitwèb èk inn bardrin d-ribrik (larboresans yérarsik), ousa i pé anboutiké indé bann zartik. sistèm-la i pé zèr osi bann forom-kozman èk bann tit-nouvèl (sak lé itil, pa égsanp, po fé inn tourlaprès..).

Ni sar rogard anba terlà kosa i lé bann zéléman SPIP lé kav zéré dann lo vèrsyon ni donn aou.

1. Lo bardrinn d-bann ribrik

Inn ribrik lé inn léspas po akèy out bann zartik, out bann tit-nouvèl...I pé apèl ali inn dosyé la minnm manyir ou néna bann dosyé si out lordinatèr, ousa ou pé anboutiké out bann fisyé-dokiman .

Kank ou sar instalé out promyé sit SPIP, ou sar trouv otomatikman inn promyèr ribrik-mèr sak i apèl "lo rasin" lo sit. I pé ékri inn lartik sirlosan, é pibliyé lartik-la fasilman. Somansa, é pli inportan, sa lé lo rasin out bardrinn d’bann ribrik. Akoz lo sistèm SPIP i donn aou la posibilité kré inn yérarsi po out bann ribrik sak i pèrmé aboutiké ansanm linlot. Dopwi lo rasin lo sit ou pé kré inn yérarsi klèr po zéré answit larboresans out sit.

La manyir anboutiké out bann ribrik-la i sar kré larborésans-la. Kiswa ou la plas lo ribrik andann inn ot ribrik-mèr, kiswa li lé lib, indépandan tout bann zot ribrik. Dann ka-la li lé indé pwin lantré andan lo sit li-minm (kank ou la fé inn ribrik lib komsa, ni apèl ali inn tèt-ribrik o inn sèktèr). Lanboutikaz out bann ribrik lé kom lézos out sitwèb, akoz lé otour ou sar mèt tout bann diféran zéléman é kontni dout sit (bann zartik, bann tit-nouvèl, bann sit sindiké...)

Anba tèrla, ou pé vwa lo ribrik 1 èk lo ribrik 2 i fé bann sèktèr (li pé rasamn inn gran « séktèr tématik » pou lo kontni lo sit).

image 113 x 122

Koman ou pé dépliy out yérarsi èk bann séktèr po out larborésans ? Riyink lé pli sinp. Alala anlèr-la, bann ribrik 11, 12 é 13, li lé anndan ribrik 1. Li fé inn promyé fil yérarsik andann lo promyé séktèr. Bann ribrik 221 é 222, zot-la lé andann ribrik 22, sak i lé li-minm andann ribrik 2. Néna inn dézyèm séktèr èk son fil yérarsik.

Sak ni apèl lo yérarsi sa lé lo somin lozik i trinn anlèr ziska inn ribrik. Somin-la pou lo ribrik 221 i lé : rubrik 22, épi ribrik 2.

Lé tré sinp po zèr lo striktir yérarsik out sit : ou pé présiz sanm inn méni déroulèr ousa ou vé mèt inn nouvo ribrik. Parèy po sanzé laplas inn ribrik déza instalé : ou sar sanz sinpman son plas, sanm glisé lo non la ribrik ousa ou vé li aparé sanm méni déroulèr-la.

image 292 x 121

Lo désin anlèr armontr aou kouman i pé fé po sanz laplas inn ribrik. Kank ou lora déplasé ribrik-la, rogard byin son bann souribrik la déplas osi. Zoot la i swi ali anndan son nouvo landrwa. Si nou déplas pa égsanp lo ribrik 22 anndan lo ribrik 12, banna 221 èk 222 i swi ali (ni loré pi plasé lo ribrik 22 kom tèt-ribrik, oubyinsa anndan lo ribrik 23 pa égsanp. Somansa lintèrfas grafik i pérmé pa plas ali anndan lo ribrik 221 : akoz sinons ni loré gigny inn boukl lo sistèm lé pa kav roulé.

Ousava trouv tèrla lo promyé gros limit po SPIP : li lé sèlman kav zéré inn sèl striktir, sat ni la dékri anlèr. Akoz sa :
-  Inn ribrik li pé pa èt anndan dé ribrik an mèm tan ; po inn sit si lo sinéma, li sré pa posib, mèt pa égsanp mè lo ribrik « Orson Welles » anndan inn ribrik « Réalizatèr » é anndan inn ot ribrik « Aktèr ») ; akos sa lé pa posib anmayé bann ribrik an krwa ;
-  SPIP lé pa kav zéré bann striktir an boukl (ni apèl rékirsiv).

Bann limit la lé pa inn larlik téknik : li obéi nout volonté kosèrvé inn sinplisité po litizasyon sitout po lintèrfas (lé fasil kréé inn lintèrfas komsa ; mé néna inn bon pè d-larlik po lèrgonomi èk plizyèr yérarsi o bann striktir an boukl).

Ou pé mèt inn forom litousèl anndan sakinn ribrik (anon vwar anba).

Anon fini parti-la si bann ribrik sanm éspliké lo prinsip bann ribrik aktiv. Souvandfwa kank ou lé apré travayé su inn ribrik, bandna lé vid ou zot i kontyin sèlman bann zartik sat lé pokor piblyié (lé antrinn préparé, pokor piblik). Mazin pa égsanp lo ribrik 221 li kontyin pa okinn lartik pibliyé ; si inn vizitèr lété vni su rubrik_la , li noré pa pi ryin vwar. Akoz tousala, ni sépar bann ribrik aktiv é bann ribrik i dor ankor. ifo ou gar byin an tèt sad sélman bann ribrik aktiv, èk inn lartik omwin anndan, i pé parèt su lo sit piblik ; Minm si ou la kréé indé bann zot ribrik vid dann out larborésans, ou sar pa vwar azot "an liny" si lo figirwèb. Sèlman bann ribrik èk bann zartik pibliyé (ou sak i kontyin inn souribrik omwin èk in zartik an liny) i pé afis vréman si lo sit po out vizitèr..

Zestyon-la, po bann ribrik aktiv. ribrik i dor, lé otomatik anndan SPIP. Lo wébmèt i dwa byin pans soz-la.

2. Bann zartik

Bann zartik lé tré sinp po zéré : anndan inn sèl ribrik. Sèlman. Ou sar trouv inn méni déroulèr po indik ali.

Inn ribrik sak néna déza son bann souribrik i pé limèm anboutiké son bann zartik, anlèr souribrik-la.

Lo statu lartik lé la sèl soz in pé délika. I pé èt :
-  apré lékritir : son lotèr ou son bann zotèr lé an trinn travayé. Lartil-la lé pokor vizib si lo sit piblik. Son laksé lé limité si lo sit privé ;
-  propozé pou lapblikasyon : kank lotèr i pans son lartik lé fini,li propz ali dovan lo komité-lékritir (bann komandèr èk tout bann zot lotèr) pou désidé pibliy ali ou pa. Lartik-la lé pokok vizib si lintèrfas piblik, somansa tout bann dalon dann léspas privé i pé vwar ali. Bandna lé invité doon son lavi dann lo forom lartik ;
-  pibliyé : lartik lé vizib si lo sit piblik ;
-  arfizé : lartik lé pa pibliyé.

Néna pwinn tro dot soz pou konprann èk bann zartik ; lo rès lé trè sinp. Ou sar zèr bandna sanm inn lintèrfas wèb.

Inn limit : ou pé sèlman plas inn lartik anndan inn sèl ribrik (kom nou la di pli o pou lo problèm lamanyièr dpansé lintèrfas).

Po sak lartik ou pé mèt inn forom anba (anon vwar pli lwin).

3. Bann tit-nouvèl

Kosa ni apèl bann tit-nouvèl, i rosanm lo mo anglé news. Sa lé bann « zartik » mwin gran k-bann vré zartik. Epi zot lé pa sinyé otomaikman. Kontrèr, lé tré sinp azouté inn gatirwèb zisk inn ot lartik o sitwèb. bann tit-nouvèl lé idéal po f inn tourlaprès an liny (mé inn ot lizaz lé posib osi).

Bann tit-nouvèl néna in zéztyon mwin konpliké sad bann zartik :
-  i pé sèlman èt atasé èk bann sèktèr, bann tè ribrik des têtes de chapitre (dann nou légsanp anlèr, bandna i sré pou korespond èk ribrik 1 é 2) ;
-  bandna lé pa sinyé nopli, é lé trè sinp po mèt azot an plas : lintèrfas lé rédwi, inn sèl klik i sifi po lakofirmasyon.

Lé posib mèt inn forom anba sakinn tit-nouvèl-la (anon vwar anba tèrla).

4. Bann forom kozman

Spip i sava zèr otomatikman tout bann forom kozman. Bandna lé irèkman lyé èk lo kontni léditoryal out sitwèb : ou pé ouv inn forom litousèl pou sak lartik, sak tit-nouvèl, sak ribrik.

Kank ou la zist instalé SPIP, néné bann forom "sanswa" modéré deryèr. I vé dir sak pou tout bann modékri inn litizatèr i pé anvwa, néna inn piblikasyon sirlosan. Bann komandèr i pé lir ali sanm inn lintèrfas azot. Lé parèy pou tout bann dernyé kontribisyon anndan forom-la dopwi inn seminn. I pé si néna bezwin dégrenn azot. I pé siprim bann modékri sak i vé pa pibliyé an liny.

Lo komandèr lo sit i sra kav osi sanz lamanyir forom-la i roul. I pé swazi komsa sak néna :
-  pa okinn forom anlèr la ;
-  bann forom modéré dovan : bann kontribisyon i aparé èlman aprè inn komandèr la finn konfirm ali ;
-  bann forom si labonman : bann dalon-la i dwa dabor inskri azot si lo sit pou mèt ansanm andann forom. Zot i sar gany inn limèl otomatik èk son kod pou akosté anndan la.

Bann modékri ou la suprimé lé pa dégréné anndan labazdodné : SPIP i mèt azot anlèr sil koté, é i afis ladrès IP son lanvwayèr, èk lo dat é lèr lanvwa. Lé indispansab dovan in larlik ziridik ou si ou néna inndé "spamèr" fou (sédir bann moun i rèt pa anvwa bann modékri annwiyan).

Lé posib intèrdi lizaz inn forom po inn lartik prési, kanminm néna lo fonksyon forom i roul si bann zot zartik.

5. Bann lotèr

Néna dé fason pou zéré bann lotèr èk SPIP : néna inn pou la mantir sinyé bann zartik (non gaté, zéztyon ban ladrès imèl, rakont kisa ou lé...), néna inn ot po lazéztyon laksé si lo sit privé. Ou sar zèr lé dé la sanm inn lintèrfas paréy (mé sélman si ou lé komandèr).

6. Bann sit sindiké

Bann sistèm pi la piblikasyon otomatik (SPIP, phpNuke...) i sar fabriké tousèl inn fisyé standardizé (an XML) sak i indik out bann dernnyèr piblikasyon. SPIP i pèrmé aou rékipèr bann fisyé-la si lo rézo, é anboutik azot si out sit pou out prop sit. Ou pé alor indiké bann piblisayon ou la trouv intéresan si bann zot sit. Kank bann sit-la lé mi azour, lindikasyon zot bann nouvèlté i ariv otomatikman sir out sit.

Anndan SPIP, bann sit sindiké lé plasé anndann sakin ribrik ( pou afisé, koté bann zartik, dot sak néna in tèm rosamblan si inn ot sit).

7. Bann filisinyatir (pétisyon)

Kiswa out lartik, lé posib atas ali in fil sinyatir. I fo sinpman détrwa klik po instalé in filsinyati komsa ( po invité bann vizitèr siny out tèks).

Lo sistèm pou lo filsinyatir i sar zèr otomatikman inn kofirmasyon sanm limèl (inn limèl lé anvwayé pou lo sinyatèr, èk in URL i dwa vizité pou kofirmé son sinyatir prop). Ek sistèm-la lo filsinyatir i aparé pli fiab, pli vré, akoz néna obligatwarman in limèl pou sakinn sinyatir.

8. Bann molaklé

Lé posib kré bann molaklé an gatiraz èk bann zartik. Inn lartik i sra pou èt gatiré pa égsanp sanm bann molaklé-la : « Frans », « Politik »... Bann molaklé i pèrmé propozé bat-karé su lo sit sanm bann minm tèm ; i pérmé dépasé lo limit sak èk SPIP inn minim lartik lé sèlman prézanté andan in ribrik sèlman.

Lotèr : Pascale Publié le : Mis à jour : 26/10/12

Traductions : عربي, català, corsu, Kréol réyoné, English, Español, français, italiano, Nederlands, Português do Brasil, română, slovenčina, Türkçe