Cosa hè SPIP ?

Un sistema di pubblicazione pè internet.

SPIP, sistema di pubblicazione

SPIP hè un sistema di pubblicazione per internet. Ma chì serà ? Sò tutti i schedari, stallati nant’à u vostru contu web, chì vi permettenu di dispone d’unepoche di funziunalità autumàtiche : gestisce un situ in parechji, mette in pàgina artìculi senza avè da scrive còdice HTML, mudificà a struttura di u vostru situ in quattru è trè sette ... Cù u listessu prugrammu chè vo usate pè visità un situ, vale à dì u vostru navigatore (Netscape, Microsoft Explorer, Mozilla, Opera...), SPIP permette di custruisce è di mantene à ghjornu un situ, à traversu un’interfaccia assai sèmplice.

Esistenu altri sistemi di pubblicazione, bella sicura, è ognunu hà e so specificità. Oghje ghjornu, unu frà i più cunnisciuti hè phpNuke, chì impone una struttura bella rìgida, fatta à purtale cù corti artìculi. Invece SPIP hè più sòffice, è piuttostu giratu versu a creazione d’un situ strutturatu cum’è un ghjurnale : vale à dì cù rùbbriche, sotturùbbriche (è tira avanti ...), duve sò inseriti artìculi è dispacci chì ponu esse cumplettati da i fori di ragiunate.

Perchè SPIP ?

SPIP hè un prugrammu lìberu distribuitu sottu Licenza Pùbblica Generale GNU (GNU General Public License o GPL). I bisogni richiesti da SPIP, ch’elli sianu di prugrammi o di materiali, sò ragiunèvuli è certe volte sò ancu dispunìbuli ind’è unepochi d’òspiti gràtisi (vede a Fiera à a Quistioni è u manuale di stallazione pè sapè ne di più - o puru, più direttamente : PHP+MySQL).

SPIP hè distribuitu di gràtisi nant’à stu situ.

U vantagiu di SPIP, hè di ...

-  gestisce un situ web cum’è un ghjurnale, vale à dì cumpostu guasi tuttu d’artìculi è di dispacci inseriti in un’arburatura di rùbbriche ficcate l’une dentr’à l’altre. Per sapè ne di più, vede a lista sana di e caratterìstiche di SPIP.

-  sparte sani sani trè tippi di faccende trà diverse persone : a cumpusizione gràfica, a cuntribuzione di scrittura prupunendu artìculi è dispacci, è a gestione edituriale di u situ (chì cuntene l’urganisazione di e rùbbriche, a cunvalidazione di l’artìculi pruposti ...).

-  scioglie u webmaestru è tutti i participanti di a vita di u situ d’una mansa di faccende fastidiose leate à a pubblicazione nant’à u web, è dinò di cunniscenze tècniche troppu longhe à acquistà. A stallazione di SPIP si face à traversu un’interfaccia linda è à passi di gatta, è compia ch’ella hè, pudete puru principià à creà i vostri artìculi è dispacci.

E caratterìstiche di SPIP sò ...

Per i scrittori è l’amministratori

-  Un’interfaccia web chì vene naturale rende assai fàciule a scrittura d’artìculi è di dispacci, è dinò a gestione edituriale di u situ. Inoltre, accurtatoghji tipugràfichi permettenu d’accuncià un testu senza usà u linguagiu HTML, è cusì rende a cuntribuzione scritta accessìbule à tutti, è linda linda quant’è scrive un e-mail.

Per u webmaestru

-  L’aspettu gràficu è a navigazione sò discritti da mudelli HTML (o « furmati specìfichi ») chì definiscenu ognunu una « vista » (per esempiu : una vista per a pàgina d’accogliu, un’antra chì face vede una rùbbrica è u riassuntu di u so cuntenutu, un’antra per u ditagliu d’un artìculu, un’antra per u ditagliu d’un dispacciu, ...). A manera ch’ellu hè inseritu u cuntenutu scrittu di u situ in quelle pàgine hè definita da unepochi di pseudo-tags HTML abbastanza fàciuli da manighjà.

-  SPIP ùn abbassa mancu appena e pussibilità gràfiche è di navigazione di u situ. I mudelli sò fatti sani sani da u webmaestru di u situ, dunque vene pussìbule di gestisce certi elementi di u situ cù SPIP è u restu à a manu, o aduprendu qualchì altru sistema di pubblicazione (basta chì quessu sia tullerente quant’è SPIP, bella sicura).

Per i visitori

-  Un sistema di « cache » in a parte pùbblica di u situ rende questu più veloce, franchendu à a basa di dati una mansa di richieste, è cusì face dinò da sintinella contr’à e cascate in panna di a basa (cosa abbastanza sparta per i servori « belli carchi ») : tandu ferma dispunìbule u situ di listessa manera, ma vene impussìbule qualsìasi mudìfica di u cuntenutu (ancu quella di i fori).

-  Un mutore di ricerca è d’indizzazione integratu à SPIP (basta ch’ellu sia attivatu da u webmaestru) permette di fà ricerche nant’à u cuntenutu sanu di u situ.

Svantagi

Fin’ ad avà, l’adopru pràticu è sòffice di SPIP intende qualchì sforzu d’amparera à u webmaestru, da ch’ellu possi mudificà a presentazione predefinita. Invece di sistemi assai chjosi cum’è phpNuke induve pudete scambià culori è logo clicchendu solu nant’à un buttone (ma hè tuttu quì ciò ch’avete u dirittu di fà ...), cù SPIP tocca à u webmaestru à amparà i pochi fundamenti di pseudo-HTML chì li permetteranu dopu di fà guasi ciò ch’ella li pare.

SPIP hè dispunìbule cù un cumplettu furmatu d’interfaccia di navigazione ; tempu ch’è vo averete principiatu à creà u cuntenutu di u vostru situ, serà quessu sùbbitu visitèvule, accunciatu da l’interfaccia gràfica predefinita. Bella sicura, u webmaestru si pò custruisce a so interfaccia gràfica propria, s’ellu vole.

In futuru hè privista chì parechje prisentazioni sianu furnite cù SPIP, permettendu cusì à a maiò parte di i webmaestri d’aduprà ne una chì li cunvene, è cusì di limità u sforzu di persunalisazione.

Esempi

L’esempiu stòricu d’adòpru di SPIP hè u webzine uZine2 (hè statu ripigliatu u còdice di stu situ, - à principiu era specìficu- , da creà u SPIP genèricu). Frà tanti siti chì viaghjanu cù SPIP, mintuvemu Le Monde diplomatique è Vacarme.

Cuntinuà ...

Per andà più in dà è cappià vi veramente cù SPIP, vi serà ùtule d’andà à leghje a ducumentazione, l’esempi è i « primi passi » pruposti in sta rùbbrica. Liste di diffusione vi sò dinò disposte per scambià quistioni, cunsigli è minichichje. À prestu !

Autore tavamig Publié le : Mis à jour : 05/10/22

Traductions : عربي, asturianu, български, brezhoneg, català, corsu, Kréol réyoné, Deutsch, English, Esperanto, Español, فارسى, français, galego, italiano, 日本語, Lëtzebuergesch, Nederlands, òc lengadocian, polski, Português, română, русский, slovenčina, Türkçe, українська