Actualizar la version d’SPIP

De far una actualizacion d’SPIP, es simple que non sai. Pasmens, vaicí un metòde recomandat per evitar leis errors.

La procedura, que descrivèm en detalh çai sota, pòt semblar complicada. En realitat, intram a bèl exprèssi dins lo detalh de cada operacion per vos evitar certaneis errors; mai dins la practica, l’actualizacion d’SPIP se realiza en quauquei minutas e es tras que simpla.

1. Sauvatz vòstra basa de donadas

Avans tota modificacion importanta d’un sistèma informatic, sempre se conselha de far un sauvament de precaucion.

Notatz ben: se tracta ren que d’una precaucion. Siatz pas obligat/ada de la faire, e lo fichier d’aqueu sauvament vos servirà de ren bòrd que l’actualizacion d’SPIP se debanarà sens problèma!

Es la meteissa logica que quand modificatz lo sistèma d’esplecha de vòstre ordenador (installar una version nòva de Windows, de MacOS o de Linux...): i sauvatz vòstrei documents importants mai sabètz ben que, se l’actualizacion s’es ben debanada, auretz pas mestier de tornar installar aquelei documents.

Aqueu ponch es important: sauvatz vòstra basa de donadas avans l’actualizacion, mai la tornetz pas installar! D’efiech, avèm constatat que fòrça usanciers sauvavan sa basa de donadas, que fasián l’actualizacion, puei que tornavan installar sei documents a partir d’aqueu sauvament —aquò es una error— e sei sits presentavan alora de disfoncionaments. Lo sauvament es una precaucion simpla en cas de problèma gròs pendent l’actualizacion, mai se l’operacion se debana ben (es quasi sempre lo cas!), devètz pas tornar installar aqueu sauvament. (Lo sauvament se realiza amb una estructura dei donadas correspondent a la version precedenta d’SPIP; s’installatz aquelei donadas après l’actualizacion, lei tornaretz installar dins una estructura qu’a evolucionat, en fasent aparéisser ansin de problèmas.)

Per realizar lo sauvament de vòstra basa de donadas (valent a dire de l’integralitat de vòstrei documents realizats amb SPIP), rendètz-vos dins la pagina “Sauvagarda/restauracion de la basa” de l’espaci privat, e clicatz subre lo boton “Sauvagardar la basa”.

La procedura d’autentificacion per FTP s’avia:

image 420 x 225

La pagina nòva vos indica un nom de recopiar, coma “admin_xxxxx”. Copiatz aqueu nom, puei desmarratz vòstre logiciau-client FTP. Rendètz-vos au vòstre còmpte FTP que correspònd a vòstre sit, puei plaçatz-vos dins lo dorsier “/data” que se tròba dintre lo dorsier “/ecrire”. Dins aqueu dorsier “/data”, creatz un dorsier novèu que li donaretz lo nom indicat çai sus (doncas vòstre dorsier novèu aurà un nom de la forma “admin_xxxx”).

Un còp qu’auretz creat aqueu dorsier, tornatz a la pagina de vòstre navigador, puei clicatz subre lo boton “tornar cargar aquela pagina”. Alora lo sauvament es fach.

S’o desiratz, podètz verificar dins vòstre logiciau FTP que lo document “dump.xml” (o “dump.xml.gz”) s’es creat: aqueu document es lo sauvament de vòstre sit. Lo podètz laissar dins vòstre còmpte FTP o lo telecargar dins lo vòstre ordenador pròpri.

2. Installatz la version nòva d’SPIP

La procedura vertadiera d’actualizacion comença aicí.

Lo principi es ben simple: basta d’installar lei fichiers d’SPIP un còp mai, exactament coma aviatz fach pendent la primiera installacion. Siá amb “spip_loader” que vos installa lei fichiers automaticament, siá mai tradicionalament en descomprissent SPIP dins lo vòstre disc dur e en mandant totei lei fichiers per FTP en cò de vòstre aubergador.

Notatz ben: es pas necite de suprimir lei fichiers de la version precedenta. Es ni necite nimai conselhat: d’efiech, se suprimissètz lei fichiers ancians, probable deurez tornar parametrar SPIP (indicar lei donadas de connexion a la basa de donadas, etc.): es una procedura inutila se vos acontentatz d’espotir lei fichiers ancians amb lei novèus. En escafant lei fichiers ancians, e mai riscatz d’escafar leis imatges contenguts dins vòstreis articles! Doncas, restatz simple/a: es inutil d’escafar qué que siá avans d’installar lei fichiers novèus; lei novèus espotiràn leis ancians automaticament...

3. Amodatz l’actualizacion de vòstre sit

Un còp que s’es reïnstallat totei lei fichiers (per FTP, o automaticament amb “spip_loader”), rendètz-vos dins l’espaci privat de vòstre sit.

Notatz ben: esperatz que totei lei fichiers sigan ben installats en cò de vòstre aubergador. Es inutil d’assajar d’intervenir dins vòstre sit pendent lo transferiment dei fichiers, qu’obtendriatz de resultats incoerents...

Dins vòstre espaci privat, obtenètz de lònga lo messatge: “Messatge tecnic: cau lançar la procedura d’actualizacion per fin d’adaptar la basa de donadas a la version nòva d’SPIP. Se siatz administrator/tritz dau sit, vougatz clicar sus aqueu liame.”:

image 350 x 109

Coma administrator/tritz, seguètz lo liame per poder amodar l’actualizacion d’SPIP. Arribatz a un ecran d’autentificacion per FTP, exactament similar a la procedura ja descricha çai sus (per sauvar la basa):

image 420 x 225

Un còp mai, copiatz lo mot qu’aquel ecran indica e, amb vòstre logiciau-client FTP, creatz un repertòri nòu dins “ecrire/data”, e donatz-li lo nom que venètz de copiar.

Clicatz subre “tornar cargar aquela pagina”, aquò amòda l’actualizacion de la basa de donadas d’SPIP.

Vaquí, avètz acabada l’operacion d’actualizacion.

Repetigam aqueu conseu perque es una error fòrça classica: tornetz pas installar la basa de donadas a partir dau sauvament qu’avètz fach avans. Aqueu sauvament correspònd d’ara enlà a una estructura anciana dei donadas, donc es mai o mens inutilizabla. Se l’operacion s’es ben debanada, e mai podètz destruire aqueu sauvament ancian.

En cas d’auvari!

-  Dins d’uneis endrechs de l’espaci privat (e de còps que i a dins lo sit public), obteni de messatges d’error coma “file not found” (s’es pas trobat lo fichier), “file missing” (lo fichier manca), o d’autrei messatges qu’indican un problèma de fichier incomplet o mancant.

Benlèu i a agut de problèmas pendent lo telecargament dei fichiers per FTP. Amb vòstre logiciau-client FTP, verificatz la talha dei fichiers incriminats; e mai que mai, s’un fichier a una talha de 0 ko, tornatz installar aqueu fichier.

-  Obteni fòrça messatges d’error.

Tornatz installar, un còp mai, l’integralitat dei fichiers per FTP. Quau saup?...

-  Mon sit fonciona correctament aperaquí mai d’unei foncions marchan pas ben, lei redactors rescòntran de problèmas mentre que tot fonciona ben per leis administrators, etc.

Rendètz-vos dins la lista de difusion deis usanciers d’SPIP. Bèu primier, consultatz leis archius d’aquela lista per veire se vòstre problèma ja l’an pas arrambat. Senon, expausatz vòstra question dins la lista en fasent vòstre pron per èsser precís/isa: quin aubergador?, a partir de quina version avètz fach l’actualizacion? Oblidetz pas de senhalar s’aqueu problèma ja apareissiá o non dins la version precedenta. Se vòstre problèma es un bug encara inconegut, lei desvolopaires trabalharàn lèu lèu subre la question per liurar una version corregida.

Aquest article es en occitan provençau.

Autor : Domergue Sumien, Mòni Publié le : Mis à jour : 26/10/12

Traductions : عربي, català, corsu, Deutsch, English, Español, français, italiano, Nederlands, òc lengadocian, Português, Türkçe, українська