Koman ou sava fé

Po instalé SPIP

anon trouv isi tout bann létap pou swiv

Lé tré sinp po instalé SPIP : néna pwinn fisyè po sanzé èk bann varyab sorsyé. Ou dwa sinpman :

-  1. Rékipèr lo fisyé do SPIP si nout sèrvèr [1] é dépliy ali sir out prop lordinatèr. Kank ou lora dékoprésé (swazi "estrèr tout" sédir "extraire tout" èk lo forma koprésé) ou sar giny inn dézyèm dosyé, i sort otomatikman. Dann dosyé-la néna tout bann fisyé lo sistèm SPIP.

-  2. Instal lo kontni dosyé-la sir out répèrtwar FTP si lo sèvèr out lébèrzèr [2] sédir si out sitwèb (sanm FTP, kom sak ou néna pétèt labitid po instalé out bann pazwèb si out prop sit).

-  3. Konèk aou sir out sitwèb sanm out navigatèr abityèl. Azout inn "slas" sédir lo siny "/" é lo nom lo dosiyè "ecrire" la. Komsa ou sava pwar akosté an liny si la parti privé out sit SPIP, ousa SPIP minm i sar propoz aou inn lintèrfas grafik pou kofigir lo sistèm, è fé zwé po dé vré out sit an liny. Apré ou lora kadré kèk zinformasyon pou konfigirasyon-la, out sistèm SPIP li sra koplètman instalé. Ou sra kav komans travay, ékri, pibliy kosa i vé si out sit SPIP.

Lakonfigirasyon ou la bézwinn

Pou instalé SPIP, i fo ou néna inn lébèrzman wèb èk :

-  inn laksé FTP po instalé bann fisyé ;
-  lo sipor PHP3 ;
-  inn laksé inn bazdodné MySQL.

Avan minm linstalasyon do SPIP, lé nésésèr inn bazdodné mySQL sak lé byin disponib. Dann bon péd ka, i fo ou domann out lébèrzèr i fé zwé é la baz-la o gèt byin li roul ron kom sak ifo. Néna dot ka ousa ou dwa swiv inn prosédir otomatik an liny. dann tout bann ka, la mars o lo mank la bazdodné li rograd pa SPIP sa-minm. Out lébèrzèr sèlman i pé donn aou bann modpas nésésèr épi ésplik aou koman ou fé zwé la baz-la. Somansa, akoz SPIP i ansèrv bann teknolozi PHP3+MySQL, lo sit néna bézwin inn baz sak i mars, po roul ron son koté.

Ou dwa konèt inndé doné pou lakostaz mySQL (sak out lébèrzèr i dwa donn aou) :

-  ladrès la baz MySQL : pa égsanp sql.free.fr, ou localhost, ou ryin (lès sinpman vid lo karo sak SPIP i va domann aou kadré) ;
-  lo non la bazdodné : souvandfwa lé parèy lo kod-lidantité ("login" an anglé) ou ansèrv déza po ou kont wèb si lo sèvèr lébèrzèr ;
-  out kod-lidantité MySQL : sédir lo nonkod pou konèk aou si la baz("login" an anglé), souvandfwa lé parèy lo kod-lidantité ou ansèrv déza po ou kont wèb si lo sèvèr lébèrzèr
-  out modpas MySQL : souvandfwa lé parèy lo modpas po out kont wèb.

Pa égsanp si ou néna inn kont i apèl « sitamwin » sir lo sèrvèr lébérzèr Free (son ladrès lé http://sitamwin.free.fr), ladrès son bazodné mySQL lé « sql.free.fr », lo non la bazdodné lé « sitamwin », out kod-lidantité (nondkod) lé « sitamwin » é lo modpas lé parèy sakou la swazi pou out kont wèb. Ek tousala ifo sèlman ou fé zwé out bazdodné po php

Tout bann zéléman-la lé indispansab : si ou koné pa zot, ou pé pa mazin banna : kontak out lébèrzèr é domman ali i di aou kosa zot lé.

Si out prop lordinatèr, néna pwinn bézwinn okinn konfigirasyon : ou sava zèr SPIP sèlman si lo wèb. Kosa ou la bézwinn lé sèlman inn navigatèr wèb (ninpot lékèl) èk inn lozizyèl pou lo transfèr FTP sak i pèrmét aou instal bann fisyè si out kont wèb (sédir inn répèrtwar-déor si lo sèrvèr out lébèrzèr).

1. Po rékipèr SPIP

SPIP lé disponib sanm inn télésarzman gratwi si lo wèb a ladrès :
-  http://rezo.net/spip-dev/DISTRIB

Dosyè-la i kontyin plisyèr fisyé SPIP. Ou dwa rékipèr sak i koréspon out lanvironman linformatik si out lordinatèr (ni apèl lo sistèm lésplwatasyon) :
-  spip.zip ou spip.tar.gz ou minm spip.tgz si out lordinatèr lé sou Windows ou Linux ;
-  spip.sit sou Macintosh (dann ka-la ou lora bézwinn lo lozisyèl Stuffit Expander po dépliyé SPIP).

Apré ou la swazi é télésarz lo bon dosyè SPIP, dépliy larsiv-la sir out dikosdir dann lo répèrtwar ou la prévi, épi instal answit sinpman bann fisyè-la sanm FTP si lo sèrvèr out lébérzèr (sédir si out kont wèb).

2. Pou instal bann fisyé

Instal lansanm bann fisyé do SPIP ousa ou vé si out sitwèb (dann répèrtwar out kontwèb) : souvandfwa lé pratik mèt ali dann rasine lo sit, mé néna pwinn okinn obligasyon.

Ala la striktir do SPIP kank lé dépliyé é instalé si lo kont wèb :

  • Lo répèrtwar "rasine"
    • bann léskélèt .html
    • inn péd fisyé .php3
    • lo dosyé /CACHE (lé vid)
    • lo dosyé /IMG (lé vid)
    • lo dosyé /NAVPICS
    • lo dosyé /ecrire (sa lé lo pli inportan)
      • in péd fisyé .php3
      • lo dosyé /AIDE
      • lo dosyé /IMG2
      • lo dosyé /data (lé vid)

3. La mars pou swiv po konfigir out SPIP

Dorénavan a partir tout sak i va fè lé an liny. Lé tré sinp. Ou sava "vizité" out prop dosyé « /ecrire » sanm lo wèb.

Egsanp : Rann aou si ladrès lo tip : http://sitamwin.free/ecrire.

Kank ou sava konèk inn promyé fwa a ladrès-la, inn prosédir linstalasyon i sava sort firamézir. Lintèrfas lé trè sinp. Ou sra sélman pou kadré bann zinformasyon domandé (sédir bann zinformasyon si la bazdodné mySQL nou la koz anlèr-la). Aprésa, lo sistèm i sar domann aou lidantifikasyon ou la kadré. Kank lidantifikasyon-la lé fini, ou pé komans zèr out sit SPIP. Kank ou sra pou travay si lo sit-la answit é dann manyir abityèl, ou sra touzou pou konèk aou dabor sanm ladrès lo dosyè « /ecrire » la, èk out bann kod-lidantifyan.

Pou sak létap la prosèdir linstalasyon, ou va trouv inn gatir [KOUDMIN], i trinn aou si lo koudmin an liny nou la plas dann lo lozisyèl pou ésplik aou tout bann détay nésésèr pou litilizasyon do SPIP. (Sir désèrtinn sèrvèr sélman, néna inn lopérasyon délika : ifo sanz bann "drwa laksé" po désèrtinn dosyé ; lé pa byin sorsyé è lo koudmin si lo wèb i ésplik byin koman ou pé fé.)

Si ou la pa trouv larlik ziska létap ou dwa kadr out kod-lidantifyan si lo paz lo dosyé "/ecrire", linstalasyon out sit SPIP la byin finn terminé. Ou pé komans zèr out sitwèb.

Si la fé inn gro kanar (pa égsanp ou la oubliy out prop laksé si lo sit - sak i ariv souvandfwa dann komansman...) ou dwa "rolans" prosédir-la, somansa ifo ansèr out lozisyèl FTP épi éfas bann fisyé-la dann répèrtwar déor [3] :

-  /ecrire/inc-connect.php3
-  /ecrire/.htaccess (s’il existe)

Lèr lo prosinn lakostaz i va sort si lo fisyé "/ecrire", prosédir-la po kofigir out SPIP i sar komans kom sa-minm (lo mank lo fisyé « inc-connect.php3 », lé sak i trinn fransvérité larkomansman prosédir-la).

Linstalasyon otomatik

Po SPIP néna osi inn prosédir ankor pli sinp pou inn linstalasyon otomatik : ou dwa sèlman télésarz inn ti fisyé sir lo sèrvèr ousa out sit lé plasé. E sa lé fisyé-la sak i sar instal out SPIP.

Tansyon pangar : prosédir la i roul pa sit tout bann sèrvèr. Si li mars pa (ou pé rannkont toutdswit), anon pas si létap 1 espliké anba tèrla.

Po giny lo fisyé spip_loader.php3, anon vwar ladrès anba (si lo fisyé i afis dann out navigatèr, anon apiy si lo fisyé "Anrozistré sou..." (sédir « Enregistrer sous... » akoz néna pa ankor inndé navigatèr an kréol...) :
-  http://rezo.net/spip-dev/INSTALL

Ou sava télésarz lo fisyè-la kom sa minm si lo sèrvèr (ousa out sit lé ébèrzé) sanm FTP. Anon "vizit" lo paz la èk out nabigatèr abityèl (si out ladrès lo tip : http://www.sitamwin.com/spip_loader.php3) ? Aprésa, ou sar sinpman swiv lo prosédir sak lé indiké.

Si prosédir-la i roul ron byin kom sak ifo, lo piti fisyé-la (7 Ko) i sar rod po rékipèr SPIP si nout prop sèrvèr minm, épi instal ali si lo kontwèb out sit (si lo sèrvèr out lébèrzèr). Prosédir konfigirasyon-la i sar komans answit otomatikman (anon vwar létap 3 an-o-tèrla).

Arkont anou out léspéryans

Mèrsi arkont anou out léspérians prosédir linstalasyon-la, dann forom kozman anba tèrla o sanm inn modékri si limèl spip@rezo.net. I pé èd anou rann bann soz méyèr. Si ou la fé ou-minm out prop linstalasyon, mèrsi indik anou :

-  lo non out lébèrzèr (lé inportan pou akoz in rann anou kav maziné bann diféran zébèrzèr (sirtou banna lé gratwi) i pé roul ron èk SPIP) ;

-  si ou la trouv bann kanar, bann larlik ou bann difikilté (banna i pé minm èt bann difikilté èk lintèrfas o la prézant dokimantasyon po linstalasyon. Ek out bann komantèr ni sra pou rann azot méyèr osi) ;

-  kanminm out linstalasyon la byin roul ron, anvwa anou inn modékri : lé touzou itil anou (lé inn linformasyon intéresan pou nou).

Bann komantèr

[1Astèr, fisyé-la lé koprésé po li swa pa tro lour po lo télésarzman ; rogard byin bann zéktansyon (".sit",".tgz",".zip") é swazi lo forma do koprésyon adapté pou out sistèm linformatik). Kank ou lora sarzé lo fisyé ou vé, ou sava giny inn dosyé "SPIP..."(èk lo non la vèrsyon ou la télésarzé).

[2ou sir out sèrvèr pèrsonèl, pa égsanp si ou néna in sèrvèr APACHE sir out diksodir)

[3sak lé si out kontwèb si lo sèrvèr out lébérzèr

Lotèr : Pascale Publié le : Mis à jour : 20/05/15

Traductions : عربي, català, corsu, Kréol réyoné, dansk, Deutsch, English, Español, français, galego, italiano, Nederlands, òc lengadocian, polski, Português, Türkçe