Parlendu di i fori

Fate casu: ùn sò più uspitati fori nant’à stu situ. In cunsequenza st’artìculu ùn hè più d’attualità. Hè solu tenutu da archiviu, postu ch’ella ferma sempre vàlida a parte chì tratta di a muderazione.

I fori in tutte e lingue

Venenu attivati i fori à livellu d’una rùbbrica. Di fatti, per tutti l’artìculi di u situ, hè cunservata a cunfigurazione «predefinita» di i fori (vene à dì attivati è muderati dopu). U solu affare hè chì di règula ùn venenu à cumparisce in i mudelli; ma lascia quessa a pussibulità in sèguitu di «ghjucà» cù i fori per ogni pàgina in casumai di futuri sviluppi (per esempiu: rimette u sistema di «nutazione» di e FAQ).

Per creà una rùbbrica «à foru», basta à appiccicà li, in u spaziu privatu, u segnu «Fori». Tutti l’artìculi pubblicati in sta rùbbrica averanu tandu l’interfaccia apposta per i fori.

Nant’à spip.net, i fori anu un tema. U tema hè u tìtulu di l’artìculu chì l’accoglie:
-  da ottene una classìfica «lògica» di i fori, date puru un nùmeru à l’artìculi (per esempiu: «1. Stallazione», «2. Adopru di u spaziu privatu»...);
-  in u testu di l’artìculu, scrivite puru qualchì descrizzione in un o dui paràgrafi, da spiecà u sugettu trattatu in stu foru.

N.B. I fori di lingua venenu à cumparisce in a culonna à manca, qualsìasi a pàgina di rùbbrica.

Muderazione di i fori

Quand’è vo create l’artìculu di foru, site individuatu in autumàticu da autore di l’artìculu (funzione predefinita SPIP). Sè vo a lasciate cusì, riceverete un mail à ogni messagiu postu in u foru di st’artìculu. Vi pone vene còmuda quessa per seguità a vita di u foru; ma pò ancu diventà una sega s’ellu hè assai praticatu u foru (parechji messagi à ghjornu). Tocca à voi à sapè sè vo vulete riceve quelli mail di veghja di u foru.

Da ùn riceve li più, basta à ùn esse più l’autore di l’artìculu. N.B. Di listessu modu, basta à aghjunghje da autore qualunque voli riceve sti mail.

Cù a sperienza, sapimu chì i fori di SPIP diventanu in furia belli zuffi. A nuvella prisentazione hè fatta da ch’elli sianu cunsultèvuli più fàciule (in particulare per a ricerca d’una quistione digià posta). Da facilità l’archiviu di a ducumentazione di sti fori (aghju un prublemu, lascia mi vede s’ella hè stata digià posta è risolta a mo quistione...), femu muderazione da arricumandà dui punti impurtanti:
-  e quistioni (i messagi di primu livellu chì inizianu un filu di discursata) devenu avè un tìtulu aggalabbatu è sensatu (cusì ferma leghjitoghju u tavulone chì riassume tutte e quistioni); e quistioni senza tìtulu devenu esse sguassate (ci hè un grossu warning in grassettu in cima di pàgina per pustà u messagiu, basterà?...); N.B. Quessa ùn vale per e risposte à e quistioni, postu chì li vene in autumàticu «> A quistione», da navigà còmudu;
-  verificate puru chì e quistioni venenu poste in u foru aggalabbatu (cù a sperienza, sapimu chì certi utilizatori postanu à cicchiciambara...); quì dinò, sguassate i messagi chì à issu locu ùn ci anu nunda à chì fà.

Pigliemu un messagiu ch’hè statu sguassatu per l’una o l’altra ragione quì sopra. In casu ch’ella era interessante a quistione (sprimata linda è chjara, sugettu nancu à trattà in u foru), omu pò turnà à pustà un messagiu cù u tìtulu currettu, o puru pustà lu in un altru foru; tandu cunsigliemu d’indettà ch’ellu s’agisce d’un messagiu turnatu à pustà, aghjunghjendu u messagiu iniziale da citazione (<html><quote>...</quote></html>).

Per altru restu, di règula ùn ponenu prublemu di muderazione i fori cunsacrati à SPIP. Più o menu, ci sò dui tippi di messagi chì ci tocca à curà:
-  i messagi chì facenu falà nant’à qualchì òspite o pruduttu cummerciale: quessi i messagi à colpu sicuru ci arrecanu minacce di lagnanze è capatoghji; s’ellu vi pare propriu diffamatoriu un messagiu (à l’usu: «vai puru, l’òspite Cosu, hè cacarònzulu bellu impacchitatu»), sguassate lu... è poi dumandate puru à l’autore di u messagiu di turnà à scrive una crìtica argumentata cum’è di si deve («cù Cosu, l’adopru di SPIP vene diffìciule o impussìbule per tale o tale ragione...»), chì, vogliu crede, serà più ùtule à l’altri participanti;
-  i messagi chì pruponenu qualchì suluzione tècnica usendu PHP, è chì aprenu una sgheza di sicurezza in i siti (à l’usu, accedendu à a basa di dati cù parulle piatte direttamente in u mudellu): pustate li sùbbitu sùbbitu un messagiu in coda, cù avertimenti in grassettu, rossu spampillulante, è ancu trumbette è trumbittoni sè vo pudete, da spiecà chì mancu per ride ci vole à aduprà stu pezzu di còdice.

Autore tavamig Publié le : Mis à jour : 26/10/12

Traductions : català, corsu, English, français, Nederlands