Stallà un plugin

Dipoi SPIP 1.9, hè pussìbule integrà plugins chì aghjunghjenu funziunalità à SPIP.

Un plugin (chjamatu dinò «insetu») hè un pìcculu prugrammu chì permette di megliurisce o d’aghjunghje funziunalità à SPIP. Hè scrittu apposta per SPIP è rispetta un certu furmalìsimu (una API) chì li permette d’interagisce cù l’altri plugins. U so nome li vene da l’inglese to plug (imbrancà) perchè deve esse assai fàciule à imbrancà nant’à SPIP, ma dinò à sbrancà. Esistenu i plugins principalmente da risponde à a necessità ch’ellu ùn diventi sprupusitatu u «nòcciulu» di SPIP — sopratuttu per ragioni di mantenimentu — è dinò facilitendu assai e pussibulità di persunalizazione di u so adopru.

Scaricà è stallà u plugin

Ogni plugin piglia forma d’un cartulare cù u so nome, chì cuntene unepochi di schedari.

Scaricatu vi lu, stallate lu puru in u cartulare /plugins à a ràdica di u situ. U cartulare /plugins ùn esiste micca da predefinitu quandu omu stalla SPIP. Vi tocca dunque à creà lu da per voi. Pudete dinò creà ci sottucartulari da classificà i futuri plugins per famiglia.

Attivà u plugin

In u spaziu privatu, u sottumenù «gestione di i plugins» di u menù «Paràmetri» permette d’attivà i plugins.

Per accede à stu menù, hè necessaria :

  • d’esse amministratore
  • d’esse in modu interfaccia sana

S’ellu ùn cumparisce micca quellu menù, serà ch’ellu hè stallatu di gattiva manera u cartulare /plugins .

Tandu cumparisce a lista di i plugins. Selezziunate quelli chè vo vulete attivà, disselezziunate quelli chè vo vulete disattivà. Clicchendu nant’à u nome d’ogni plugin, pudete vede :

  • a versione è u statu di u sviluppu. I diversi stati ponu esse :
    • stàbbile : u plugin hè statu spermintatu, è ùn deve creà prublemi;
    • in prova: u plugin hè in traccia d’esse pruvatu. Pò ancu firmà qualchì bug;
    • in corsu di sviluppu : versione di sviluppu : à ùn stallà micca in un situ in pruduzzione.
    • sperimentale : hè solu una prova. Ùn ci hè nunda di sicuru;
  • l’autore(i)
  • una descrizzione di u plugin
  • una lea versu una pàgina chì dà di più infurmazioni.

Avertimentu

FATE CASU chì, cum’è per qualsìasi altru prugrammu, v’arricumandemu forte forte di firmà attente à ùn stallà n’impurta cosa nant’à u vostru servore. U statu di sviluppu d’un plugin pò ancu fà chì u so stallamentu ùn sia senza rìsicu. Un plugin prisentatu da stàbbile pò anch’ellu cuntene errori, è cusì apre sgheze di sicurezza in u vostru situ.

Pigliate puru nota dinò ch’ella pò accade in certi casi chì dui plugins ùn sianu cumpatìbuli unu cù l’altru.

Sè vo aduprate plugins, è custattate qualcosa chì vi pare esse un bug di SPIP, hè assai impurtante chè vo fessite a verìfica ch’ellu ferma u prublemu ancu puru senza nisun plugin attivatu, prima di trasmette ci lu.
S’ellu sparisce u prublemu custattatu in assenza di plugin, circate puru u plugin culpèvule attivendu li unu dopu à l’altru, da pudè ci dà cù precisione a cunfigurazione cù chì l’avete custattatu. In mancanza di què, ùn hè mancu appena sicura chì a cumunità vi risolvi u prublemu.

Autore tavamig Publié le : Mis à jour : 26/10/12

Traductions : عربي, català, corsu, English, Español, français, italiano, Nederlands, Türkçe, українська