Fà un aghjurnamentu

Fà un aghjurnamentu di SPIP hè robba assai sèmplice. Eccu quì un mètudu «à passùculi», da noi arricumandata per francà si di i strazi.

Pò parè bella straziata a prucedura discritta quì sottu in ditagliu. Ma hè apposta chè no andemu à u più precisu d’ogni uperazione, da francà vi di unepochi di sbagli; invece in pràtica, l’aghjurnamentu di SPIP si face in quattru è trè sette ...

1. Fate una copia di salvezza di a vostra basa di dati.

Prima di qualsìasi mudificazione impurtante d’un sistema infurmàticu, hè sempre cunsigliatu di fà una copia di salvezza, ùn si sà mai.
Nutate bè: hè sola in casu mai. Mancu appena site ubbligatu di fà la, è pò hè più sicura ch’ella ùn vi ghjovi à nunda quella copia, postu chì l’aghjurnamentu di SPIP anderà à fine senza nisun prublemu !

Hè listessu affare quand’è vo mudificate u sistema di spluttamentu di u vostru urdinatore (stallendu una nuvella versione di Windows, di MacOS o di Linux...) : salvate i vostri ducumenti impurtanti, sapendu bè chì, s’ellu hè andatu à bon fine l’aghjurnamentu, ùn averete bisognu di rimette à a so piazza quelli ducumenti.

In l’artìculu «Sauvegarder vos données» hè spiegata sana sana a prucedura.

Hè d’impurtanza stu puntu : fate puru una copia di a vostra basa di dati prima di fà l’aghjurnamentu, ma ùn turnate micca à stallà la dopu ! Difatti, emu rimarcatu chì tanti utilizatori salvavanu a so basa di dati, facianu l’aghjurnamentu, è poi turnavanu à stallà i so ducumenti da quella copia di salvezza. tandu nascia u cumbugliu in i so siti, è ùn viaghjavanu più. Hè un sbagliu ch’ùn ci vole micca à fà. A copia ghjova solu in casu di prublemu maiò durante l’aghjurnamentu, ma s’ellu và quessu à bon fine (è guasi sempre cusì accade !), ùn ci vole mai à turnà à stallà a copia. (A salvezza vene fatta cù a struttura di dati chì ghjè incalcata nant’à a versione precedente di SPIP; sè vo turnate à stallà quelli dati dopu l’aghjurnata, i stallate sì, ma in una struttura ch’ùn hè più listessa, cagiunendu cusì unepochi di prublemi) Sta copia ghjova dunque solu cù a versione aggalabbata di SPIP : pensate à nutà vi la, è à scaricà una vechja versione di SPIP da pudè ricuarà tuttu cum’ella era nanzu, in casu di guai.

S’ellu ùn si pò permette u vostru situ di stà spentu un’ora o un ghjornu o puru dui, tandu diventa impurtante di fà l’aghjurnamentu lucalmente prima, da scunfinisce i prublemi prima di mette in ligna. Hè megliu ch’ellu si tratti di a listessa cunfigurazione chè u vostru spaziu Web, ma hè digià bellu d’avè pussutu verificà chì l’affare sia pussìbule senza tanti bug, cù i vostri propri mudelli è a vostra robba aghjunta.

2. Stallate a nova versione di SPIP

Principia quì da veru a prucedura d’aghjurnamentu.

L’idea hè assai sèmplice : basta à stallà i schedari di SPIP torna una volta, propriu cum’è vo l’aviate fatta in tempu di a vostra prima stallazione. Sia cù «spip_loader» chì face u stallamentu in autumàticu di i schedari, sia di modu più tradiziunale, scumpressendu SPIP nant’à u vostru discu è mandendu tutti i schedari cù FTP ind’è u vostru òspite.

Nutate bè : ùn hè mancu appena necessaria di sguassà i schedari di a versione in prima. È mancu hè cunsigliata : sè vo sguassate i vechji schedari, à colpu sicuru vi tuccherà à rifà u regulame di i paràmetri di SPIP (rinsignà i dati di cunnessione à a basa di dati, etc.), faccenda inùtule sè vo vi cuntentate di rimpiazzà i vechji schedari cù i novi. À sguassà i vechji schedari, risicate ancu di sguassà l’imàgini cuntenute in i vostri artìculi ! Pè taglià à l’accorta, fate sèmplice : ùn sguassate nunda prima di stallà i novi schedari, i novi anderanu à schiaccià i vechji da per elli ...

Essendu l’urganizazione di i schedari assai scambiata trà a versione SPIP 1.8 è a versione SPIP 1.9, una prucedura d’aghjurnamentu specìfica hè discritta in l’artìculu «Migration vers SPIP 1.9».

3. Lanciate l’allivellamentu di u vostru situ

Stallati ch’elli sò tutti i schedari (cù FTP, o in autumàticu cù «spip_loader»), aprite puru u spaziu privatu di u vostru situ ...

Nutate bè : aspettate puru chì tutti i schedari sianu stallati bè ind’è u vostru spaziu uspitatu. Ùn vale à pruvà à intervene nant’à u vostru situ mentre u trasferimentu di i schedari, ci metterete più cumbugliu chè astru affare ...

In u vostru spaziu privatu, vi venerà sempre u messagiu : «Messagiu tècnicu : a prucedura d’aghjurnamentu deve esse lanciata di modu à adattà a basa di dati à a nuvella versione di SPIP. Sè vo site amministratore di u situ, cliccate puru nant’à sta lea.»:

Da amministratore, seguitate puru a lea da pudè smarrà l’aghjurnamentu di SPIP. Tandu ghjunghjite à un screnu d’autentificazione cù FTP, listessu listessu chè a prucedura di salvezza di a basa):

image 420 x 225

V’indetta sta pàgina un cartulare è un nome da ricupià, di forma «admin_xxxxx». Cupiate puru stu nome, è smarrate u vostru prugrammu-cliente FTP. Poi andate puru à u vostru contu FTP accuppiatu à u vostru situ, è piazzate vi in u cartulare indettatu da a pàgina (cù SPIP < 1.9 era ecrire/data, avà ghjè tmp for’di qualchì cunfigurazione speziale; di tutta manera sti cambiamenti di nome sò senza cunseguenza per voi). Dentr’à stu cartulare, create puru un nuvellu cartulare chì abbia cum’è nome quellu cupiatu prima (u vostru novu cartulare averà dunque un nome di forma «admin_xxxxx»).

Cliccate nant’à «Ricaricà sta pàgina», è cusì venerà aghjurnata a basa di dati di SPIP.

Eccu, hè compia l’uperazione d’aghjurnamentu.

Demu lu torna stu cunsigliu, chì u sbagliu hè fattu abbastanza à spessu : ùn turnate micca à stallà a copia di salvezza fatta in prima. sta copia oramai currisponde à una vechja struttura di i dati, è più o menu ùn hè più adupratoghja. S’ella hè andata à bon fine l’uperazione, pudete puru lampà sta vechja copia à a rumènzula.

In casu di guai !

-  À certi punti di u spaziu privatu (è certe volte nant’à u situ pùbblicu), mi venenu messagi d’errore di quelli «file not found», «file missing», o puru altri messagi mintuvendu un prublemu di schedariu micca sanu o chì manca.

Forse seranu accaduti prublemi durante u scàricu di i schedari cù FTP; cù u vostru prugrammu-cliente FTP, verificate puru a taglia di i schedari mintuvati, è in particulare, in casu chì un schedariu fessi 0 ko, turnate puru à stallà lu.

-  Mi venenu assai messagi d’errore.

Stallate torna una volta tutti i schedari quant’elli sò cù FTP. Ùn si sà mai ...

-  U mo situ viaghja più o menu cum’ellu ci vole, ma certe funziunalità ùn viaghjanu micca bè, i scrittori scontranu prublemi, invece viaghja tuttu bè per l’amministratori, etc.

À truvà ci nant’à a lista di ragiunata di l’utilizatori di SPIP. Prima cunsultate puru l’archivi di sta lista, o u foru da vede s’ellu si hè digià discorsu di u vostru prublemu.

Fate a vostra dumanda di manera a più precisa pussìbule : chì òspite, da qualessa versione avete fattu l’aghjurnamentu; ùn vi scurdate di mintuvà s’ellu esistia digià o micca in a versione in prima.

S’ellu hè u vostru prublemu qualchì bug ancu à scopre, i sviluppori ci metteranu e mani in pasta à u più prestu, da prupone una versione curretta.

Qualchì lea in soprapiù :
-  FAQ di spip
-  FAQ Spikini
-  Aghjurnà u so situ SPIP

Pensate dinò à verificà a cumpatibulità di i cuntributi è plugins da voi usati cù a nuvella versione di SPIP, è tandu à aghjurnà li sè bisogna.

Autore tavamig Publié le : Mis à jour : 26/10/12

Traductions : عربي, català, corsu, Deutsch, English, Español, français, italiano, Nederlands, òc lengadocian, Português, Türkçe, українська