Stallà SPIP

Vene assai sèmplice a stallazione di SPIP : In particulare, ùn ci hè bisognu d’andà à sbulicà à mezu à i schedari, da mudificà « à a manu » unipochi di paràmetri di quelli strani ... Quì truverete i dui mètudi di stallazione.

Ciò chì prima duvite avè

-  Servore Apache o cumpatìbule (versioni sopr’à 1.2x)
-  Servore di basa di dati SQL (secondu a scelta, tempu a stallazione) :

  • MySQL 4.1 è versioni in sèguitu (basta a versione 3 per SPIP 1.9)
  • SQLite 2 è 3
  • PostGreSQL 8.2 è versioni in sèguitu
    -  Embiu PHP 4 (è versioni in sèguitu)

Mutamentu d’una versione più vechja di SPIP

Un ghjornu o l’altru, vi puderà vene ancu l’estru di vulè trasferisce un "vechju" SPIP versu a versione nova. Tandu nascenu dui casi :
-  avete una versione 1.9 è in sèguitu : basterà solu un aghjurnamentu
-  u vostru SPIP hè in versione sott’à a 1.9 : vene necessariu un mutamentu

Configurazione necessitata

Ùn ci hè bisognu di nisuna particulare cunfigurazione nant’à u vostru urdinatore persunale, chì omu gestisce SPIP sanu sanu nant’à u web. Avete solu bisognu d’un navigatore Web (quellu chì vi piace) è d’un accessu FTP da stallà i schedari nant’à u vostru spaziu uspitatu, ch’ella sia à traversu un’interfaccia in ligna o cù un prugrammu di trasferimentu FTP prisente nant’à u vostru urdinatore. [1].

Per stallà un situ SPIP, vi ci vulerà un spaziu uspitatu web nurmale, pruvistu d’una basa di dati SQL, è capace d’eseguì PHP. Ma state puru tranquillu : ùn hè necessaria nisuna cunniscenza di PHP o SQL da amministrà un situ SPIP ! Vi tuccherà solu à verificà ciò ch’ellu prupone u vostru òspite. Vede : «Òspiti chì accettanu SPIP».

Tenite à mente i vostri còdici d’accessu è passwords FTP è SQL. St’elementi sò indispensèvuli, sè vo ùn l’avete più, cuntattate puru u vostru òspite è fate vi li ramintà.

Prima di stallà SPIP, duvite dinò avè una basa SQL dispunìbule. Bellu à spessu, bisogna à dumandà l’attivazione d’una basa di dati à l’amministratore òspite, o seguità una prucedura autumàtica in ligna (sia cum’ella sia, l’attivazione di a basa SQL ùn hà nunda à chì vede cù SPIP; sè vo straziate, solu u vostru òspite vi puderà trasmette i vostri còdici persunali, è vi spiegherà cumu accede à a vostra basa).

Vi tocca à tene à mente i vostri dati di cunnessione SQL (furnite da l’òspite):
-  l’indirizzu di u servore SQL: per esempiu sql.free.fr, o localhost, o viotu;
-  u vostru login SQL: à spessu u listessu chè u contu Web;
-  u vostru password SQL: à spessu u listessu chè u contu Web;

À meza stallazione, rinsignatu chè vo averete st’infurmazioni, bisognerà dinò à precisà :
-  u nome di a basa di dati: à spessu u listesu login chè u contu Web - pò accade chì u servore vi permetti di creà sta basa da per voi, o à l’incuntrariu pò accade chì SPIP a ci fessi à induvinà u nome di a basa à voi rimessa da l’òspite, tandu ùn ci serà bisognu d’indettà la.

Esempiu : sè vo avete un contu chjamatu «umositu» ind’è Free (indirizzu http://umositu.free.fr), l’indirizzu di a basa SQL hè «sql.free.fr», u nome di a basa di dati est «umositu», u vostru login hè «umositu» è u password hè quellu di u contu. Vi basta à attivà a vostra basa di dati per php.

Stallazione autumàtica («spip_loader»)

U modu u più fàciule è u più veloce hè a stallazione autumàtica cù «spip_loader». Stu pìcculu schedariu anderà solu solu à scaricà SPIP è stallà lu da per ellu ind’è u vostru òspite. Attenti : sta prucedura ùn viaghja micca cù tutti i servori. In casu ch’ella ùn viaghji micca (vi n’accurgerete sùbbitu sùbbitu ...), passate puru à l’altru mètudu.

  1. Scaricate vi u schedariu spip_loader.php (o puru cupiate solu u so cuntenutu),
  2. Piazzate lu in u vostru spaziu uspitatu (cù FTP o qualsìasi modu ch’ellu vi prupone u vostru òspite).
  3. Andate à visità u vostru situ cù u vostru navigatore abituale, è chjamate u schedariu ch’è vo ci avete postu, pichjendu qualchì indirizzu cum’è : http://www.umositu.com/spip_loader.php, poi seguitate l’istruzzioni.

Stallazione à a manu

Secondu cum’ella hè cunfigurata a vostra uspitata, pò accade ch’ella ùn sia pussìbule a stallazione autumàtica. Tandu vi tuccherà à fà a stallazione à a manu, chì hè appenuccia di più straziata.

  1. Scaricate vi u schedariu di SPIP è scumpressate vi lu nant’à u vostru urdinatore persunale. Tandu vi vene un cartulare «SPIP...» chì cuntene tutti i schedari di u sistema SPIP.
  2. Punite tuttu ciò ch’ellu cuntene u cartulare (schedari è sottucartulari) nant’à u vostru situ (cù FTP o qualsìasi modu ch’ellu vi prupone u vostru òspite), à u locu chì vi cunvene da chì u situ gestitu da u sistema sia accessìbule à u pùbblicu : u più spessu à a ràdica di u vostru situ, ma ùn ci hè òbbligu.
  3. Cunnettite vi à u vostru situ usendu u vostru navigatore, in un cartulare chjamatu «ecrire», duve SPIP vi prupunerà un’interfaccia gràfica chì vi permette di cunfigurà u sistema. Fatta quessa a cunfigurata, serà SPIP stallatu in tuttu, è tandu puderete puru principià à travaglià à u vostru situ.

Compie a stallazione

Fata quessa, tuttu si face in ligna ! Basta à andà à «visità» u spaziu privatu di u situ cù u vostru navigatore, à l’indirizzu di u vostru situ, seguitatu da «/ecrire» : http://www.umositu.com/ecrire.

À a prima cunnessione à st’indirizzu principia una prucedura di stallazione « à passi ». L’interfaccia hè sèmplice, basta à empie l’infurmazioni richieste (sopratuttu quelle rispettu à a basa di dati SQL cullucate à principiu). Compia quessa, u sistema vi dumanda di cunnette vi, è tandu pudete puru gestisce u vostru situ. In sèguitu, serà sempre in quellu spaziu privatu chì vi tuccherà à andà, cù i vostri còdici persunali.

À ogni passu di a prucedura di stallazione, truverete una lea versu una finestra di l’aiutu in ligna chì spiega tutti i detagli di u funziunamentu di SPIP. (A sola uperazione appenuccia cumplicata vene nant’à certi servori : forse vi tuccherà à mudificà i «diritti d’accessu» di certi cartulari; st’uperazione ùn hè tantu un affarone, è l’aiutu in ligna vi dà ogni ditagliu necessariu.)

S’ella hè andata tuttu bè fin’à quì, hè compia a prucedura di stallazione, è tandu pudete creà u vostru situ senza nisun’altra uperazione di quelle sprupusitate ...

In casu d’errore grossu (cum’è per esempiu : vi site scurdatu di u vostru còdice d’accessu à u situ — accade à spessu à principiu ...), per «rilancià» sta prucedura di stallazione, usate u vostru prugrammu FTP è sguassate i seguenti schedari :

  • /config/connect.php
    (o puru /ecrire/inc-connect.php o php3 in e versioni vechje)
  • .htacces, s’ellu esiste
    (o puru/ecrire/.htaccess in e versioni vechje)

A pròssima cunnessione à u spaziu privatu rilancerà u prucedimentu di cunfigurazione (in verità, hè l’assenza di u schedariu «connect.php» chì u lancia).

I cartulari /config è /tmp ùn devenu esse accessìbuli à i navigatori, per quessa SPIP ci mette un schedariu .htacces chì cuntene deny from all. S’ella hè per voi una primura maiò u secretu di i vosti dati, assicurate vi puru cù u vostru òspite ch’elli sò pigliati in contu sti schedari; o sinnò andate puru à leghje l’artìculu Mette in cumunu u nòcciulu SPIP chì v’aiuterà à tramutà quelli cartulari fora di quelli accessìbuli à i navigatori.

A votra testimunienza

Da aiutà ci à porghje migliurenze à quella prucedura di stallazione, vi ringraziemu di parlà ci di a vostra sperienza in u foru «stallazione», o di scrive à spip@rezo.net (attenti : in tremindui i casi, seranu pubblicate nant’à u nostru situ e vostre risposte, sia nant’à u foru, sia in l’archivi di a nostra lista di ragiunate). In casu chè vo fessite a stallazione da per voi, per piacè mintuverete :

-  u nome di u vostru òspite (impurtante quessa, cusì averemu un’idea di i vari òspiti cumpatìbuli, è in particulare, quelli di gràtisi);

-  in casu mai, i strazi vissuti (dinò e difficultà d’interfaccia è di capiscitura di u prucedimentu di stallazione, da chì no possimu smegliurisce l’interfaccia o a ducumentazione);

-  è s’ella hè andata à bon’fine è senza straziu a vostra stallazione, mintuvate ci la puru, hè sempre un’infurmazione interessante !

Note

[1In l’embi Linux (Gnome o KDE) o ind’è Mac OS X, un cliente FTP hè integratu à u scagnu. Ind’è Windows, pudete puru aduprà u prugrammu lìberu FileZilla.

Autore tavamig Publié le : Mis à jour : 20/05/15

Traductions : عربي, català, corsu, Kréol réyoné, dansk, Deutsch, English, Español, français, galego, italiano, Nederlands, òc lengadocian, polski, Português, Türkçe