Cuando instales SPIP nun sirvidor propiu, o si utilices una instalación mutualizada de SPIP, nun van podese criar siempre los «direutorios de datos» con los permisos amañosos. Poro, vas tener que intervenir col to programa de FTP o de SSH preferíu, pa «iguar los permisos d’accesu» manualmente.
Esta operación afeuta a cuatro direutorios, pa los que SPIP va conseñate l’allugamientu. Estos camuden según si SPIP ta n’usu mutualizáu o non, y según les versiones de SPIP; dende SPIP 1.9, estos direutorios nomense IMG, tmp, config y local.
Los programes («clientes») de FTP tienen funcionamientos estremaos, sicasí el procedimientu xeneral ye’l siguiente:
- seleiciona el direutoriu al que se-y quieren camudar los «permisos d’accesu»;
- restola nel programa de FTP una función nomada «camudar (o cambear, o iguar) los permisos d’accesu»;
- si esta función presentase na forma d’una interfaz gráfica, debes marcar el cuadru correspondiente a «Escritura», pa l’usuariu «Otros» (o «Tolos usuarios»):
- si esta operación faise en mou «testu», la configuración numérica ye «777».
Cuando tengas fecha esta operación pa caún de los direutorios conseñaos pol sistema d’instalación, recarga la páxina, y el procedimientu siguirá automáticamente.
Esta etapa consiste en conseñar les informaciones necesaries pa la conexón de SPIP al sirvidor SQL.
- Señes de la base de datos: en función de los axustes de l’agospiamientu, esta información será simplemente «localhost», o bien les señes del to sitiu («www.miositiu.org»).
- L’alcuñu (login) de conexón: munches veces, ye’l mesmu alcuñu que l’utilizáu pa xubir ficheros per FTP.
- La clave de conexón: davezu, trátase de la mesma clave que la del to accesu per FTP al sitiu.
- Estes informaciones nun s’inventan: si nun les sabes, ye porque’l to agospiamientu nun te les unvió. Poro: si nun tienes a mano estos trés datos, nun vas poder continuar.
- Esta información tienen que dátela nel agospiamientu del to sitiu: pa sabela, tendrás que contautar direutamente con ellos (nun-yos pidas a l’equipu de desarrollu de SPIP que te la unvíe, ¡nos nun la conocemos!). En dellos agospiamientos, estes informaciones úfrenles con un manual d’usu en llinia.
- Alvierte que, munches veces, hai que pidir a l’agospiador que active el to accesu SQL, o facer tú mesmu una operación específica con esti envís. Abondos agospiadores que anuncien un agospiamientu que tien una base de datos SQL nun activen automáticamente esta conexón tres d’abrir el sitiu; a veces ye necesario pagar una cantidá suplementaria pola to parte (darréu d’abrir la cuenta con esti agospiador). Si ye’l casu, llee la documentación del to agospiador pa saber cómo activar la to conexón SQL. (Equí tampoco: l’equipu de SPIP nun va poder echate un gabitu.)
- Tienes que conseñar el nome de la base de datos que ufre l’agospiador. Esta información tienen que datela nel agospiamientu: si nun la tienes, has de pidiyos-la allí, o bien consultar la documentación en llinia d’esi agospiador (ye inutil que-yos la pidas a l’equipu de desarrollo de SPIP, nos nun conocemos esta información).
- Ye frecuente que esa información correspuenda col login de la to cuenta d’agospiamientu (la que utilices pa coneutar al to sitiu per FTP).
- Primera posibilidá (la más frecuente): s’amuesa una llista de cuentes (daqué llarga, seique, según la configuración afitada pol agospiador). Ente les cuentes amosáes, sólo una correspuende cola tuya, abasta entós con seleicionala y validar pa pasar a la etapa siguiente.
- Segunda posibilidá: s’amuesa un solo nome, correspondiente a la to cuenta (automáticamente, l’agospiador configuró el so sistema pa que se vea únicamente la to cuenta). Ye fácil: seleiciona esta cuenta y valida.
- Tercera posibilidá (xeneralmente cuando ye un agospiamientu pa profesionales, o si ye una máquina pa la que tienes permisos altos): tienes que criar la to propia base. Nesti casu (tres que tengas bien comprobao que nun esista esa cuenta na llista amosada embaxo), pues conseñar el nome que te pete llueu de la indicación «Crear una base nueva».
- Cabera posibilidá (fallu): la to cuenta nun apaez na llista amosada, y nun pues creala tú mesmu. Esto ye enforma raro: significa que l’agospiador crió un accesu al sirvidor de la base, pero escaecióse de criate una cuenta. Nesti casu, has de consultar col agospiador direutamente.
Esta etapa ye enforma cenciella; sicasí, hai que efeutuala con procuru. N’efeutu, ¡equí conséñense les identificaciones pa coneutase al propiu sitiu! Si procedes más rápido de la cuenta, tas en peligru de nun poder coneutate...
Decátate que cuando tea aniciáu el sitiu, tendrás la posibilidá de camudar estos datos.
- La to identidá pública: ye la que apaecerá como firma nos artículos de tó.
- Les identificaciones de conexón: son les identificaciones que conseñarás tú mesmu pa coneutate al to propiu sistema SPIP. Estos datos nun tienen necesidá dala de ser idénticos a los que conseñaron nel agospiador pa coneutate a la cuenta per FTP. Al contrario, encamentámoste non usar les mesmes identificaciones pal accesu a SPIP (qu’escueyes llibremente) y pa la conexón FTP (afitáes pol agospiador).
Delles funciones de SPIP influyen direutamente na propia estructura y conteníu de la base de datos (notablemente: anovación, copia de seguridá y restauración de la base...). Pa estes funciones, particularmente sensibles, amestose un procedimientu d’identificación per FTP, de manera que queden llendáes pa delles persones con accesu al sirvidor del sitiu per FTP (polo xeneral, si un sitiu pue tener dellos alministradores pa SPIP, l’accesu FTP ta acutáu pa un webmaster principal).
Pa utilizar estes funciones, has de facer simultáneamente:
Cuando SPIP s’atopa enfrente d’un error na comunicación cola base de datos SQL, amuesa na pantalla la consulta que falló, lo mesmo qu’el mensaxe d’error devueltu pola base de datos (en bermeyo).
El problema pue venir:
- o d’un error na definición de la to cadarma, si tas nel intre
de camudar el to sitiu;
- o d’una avería de la base de datos.
Por exemplu, un mensaxe de tipu > Unknown column 'articles.chapi' in 'where clause'
señala qu’el bucle fai una llamada al criteriu de
seleición (chapi) que nun ta previstu.
D’otra miente, un mensaxe de tipu > Can't open file: 'spip_articles.MYD'
señala un problema grave na mesma base SQL: has de
contautar col agospiador a la fín de que revise la instalación
y/o repare la to base de datos. Tamién pues tentar
una
reparación automática de la base (si la base lo permite).