Lo tractament dels imatges

[SPIP 1.8] permet d’utilizar los sistèmas de tractament d’imatge installats dins lo vòstre sit d’albèrgament. Aquelas foncions d’SPIP, ja introduchas dins la version 1.7, ara son completadas e pus poderosas.

SPIP utiliza lo tractament d’imatge de tres biaisses diferents:

— en crear de vinhetas de previsualizacion pels imatges installats coma “documents jonches”; aquò ja èra present dins la version 1.7; [SPIP 1.8] permet, en mai d’aquò, dins aqueles “pòrtfòlios”, de faire subir a cada imatge una rotacion de 90° (aquò’s pro interessant s’installatz una sèria de fòtos dempuèi una camèra fòto numerica);

— en afichar dins l’espaci privat, a tot plen d’endreches, de “vinhetas” illustrant la navigacion, a partir dels lògos dels articles, de las rubricas e mai dels autors (per exemple, s’òm baila als participants d’un sit de lògos d’autors, de vinhetas d’aqueles lògos acompanharàn totes los messatges d’aqueles autors dins los forums de l’espaci privat);

— dins las esqueletas, los webmèstres dispausan d’una foncion reduire_image pro utila per contrarotlar sa compaginacion e crear de versions diferentas (amb de talhas diferentas) d’un meteis imatge. Si que podèm encoratjar los webmèstres a “jogar” amb aquela foncion per enriquir e contrarotlar lor interfàcia grafica; ne trairàn qualque avantatge per obténer:

• d’alinhaments d’imatges perfièches (per exemple: totes los imatges de la meteissa largor), sens s’obligar d’installar d’imatges de dimensions predefinidas;
• la garentida de faire pas “espetar” sa compaginacion quand un redactor a installat imatge tròp grand,
• d’efièches de subrevòl e d’animacion realizats simplament en utilizar lo meteis imatge a de talhas diferentas (sens que se dega jogar amb los “lògos de subrevòl”),
• d’interfàcias de pòrtfòlios (galariás de fòtos) esbleugissentas...

Ça que la, per realizar aquelas operacions de tractement d’imatge, SPIP fa rampèl a de sistèmas que se pòdon pas installar automaticament amb SPIP, mas que devon èstre presents dins lo servidor qu’albèrga vòstre sit. Adoncas cal qu’aqueles sistèmas sián presents en mai d’SPIP (dich autrament: basta pas qu’SPIP siá installat per que las foncions de tractament d’imatge sián disponiblas; de fach cal qu’aquelas foncions sián presentas per endacòm mai).

Per causir un sistèma de tractament d’imatge, aquò se fa dins la part “Configuracion” (configuracion avançada) de l’espaci privat. SPIP permet de causir demest 5 metòdes diferents de tractament dels images.

Imagemagick

Imagemagick, coma extension de PHP (php-imagick), es la causida qu’SPIP privilègia. SPIP es capable de determinar solet sa preséncia. S’Imagemagick es present dins vòstre servidor, alavetz SPIP l’utilizarà automaticament.

S’Imagemagick es pas present dins vòstre servidor, alavetz SPIP vos prepausarà de causir entre d’autres metòdes. Essent qu’SPIP pòt pas detectar aqueles metòdes (e, de tot biais, pas perfièchament), vos prepausam una vinheta per cada metòde o, eventualament, pas cap de vinheta se lo metòde fonciona pas dins vòstre sit. Alara SPIP vos prepausa de seleccionar lo vòstre metòde preferit (de còps que i a, cal seleccionar lo solet qu’es disponible realament!).

GD, GD2

GD (e sa version 2, plan mai poderosa) es una extension de PHP que desenant es sovent presenta dins los servidors, incluses los albergadors mutualizats.

Se GD2 es present, lo podètz utilizar que dona de resultats de qualitat bona.

Per contra, se prepausa GD (comprenètz: “version 1 de GD”) coma eissida pièger: lo tractament dels imatges se fa en 256 colors e introdutz de degradacions fòrtas dels imatges; donc es de seleccionar sonque se cap d’autre metòde fonciona pas dins vòstre sit.

Imagemagick per Convert

Convert es lo logicial en linha de comanda d’Imagemagick. La qualitat vos esbleugís que non sai, pasmens son installacion es relativament complèxa.

Un còp qu’avètz installat Convert dins vòstre sit, devètz configurar lo camin d’accès dins mes_options.php3 (se tracta d’una crida en linha de comanda) per la variabla seguenta:

Aicí conven d’indicar lo camin complet d’accès al programa. Jos Linux, aquel camin es sovent

Jos MacOS X, s’es installat amb Fink:

(Aquelas valors las porgissèm a títol indicatiu; coma tot programa, lo podètz installar gaireben ont que siá...).

NetPBM

Aquel metòde consistís en tres programas, ja ancians, que permeton de redimensionar l’imatge. L’avantatge d’aquel metòde es qu’aqueles programas los podètz installar sens accès raiç (root) dins la màger part dels albèrgaments.

Trobaretz, al sit del logicial galariá (gallery), [una explica clara e de versions precompiladas de NetPBM.

Dins SPIP, se configura lo camin d’accès a pnmscale (qu’es pas qu’un dels tres programas installats — los dos autres camins se’n deduiràn, essent que los programas sont installats dins lo meteis repertòri) per la variabla seguenta:

(un còp mai, vos tòca a vos de determinar lo camin d’accès real de vòstra installacion).

* *

Per la remembrança, podètz obténer maitas informacions utilas dins vòstre sistèma via la pagina /ecrire/info.php3, especialament:
— lo sistèma utilizat (util per installar NetPBM precompilat);
— la version de PHP;
— la preséncia eventuala de las extensions GD, GD2 e Imagemagick.

Enfin, en cas de dificultat, la melhora solucion es de contactar lo vòstre albergador per qu’installe las extensions necessàrias se cap es pas presenta. La preséncia d’almens una extension grafica de PHP, d’ara enlà, es una nòrma pels albergadors: esitetz pas de demandar que l’installen per ne beneficiar dins vòstre sit.