U principiu
1. Cumu facciu per mudificà a paginatura di u situ pùbblicu ?
A gestione di l’appaginamentu s’appoghja nant’à schedari d’estensione .html chjamati mudelli d’appaginamentu. Anu listessu scopu chè quelli chjamati in francese da altri prugrammi « modèles » « gabarits», o in inglese, «templates».
À ogni schedariu vene assuciatu un tippu di pàgina sferente : cusì ne, ci hè un mudellu per a sunta, unu per fà cumparisce l’artìculi, unu per e rùbbriche, etc. Un mudellu cuntene còdice HTML standard chì definisce a vestitura di a pàgina, è venenu inseriti nentru «còdici» specìfichi à SPIP, da discrive qualesse infurmazioni anu da vene à « accampà » sta vestitura.
Hè assai sgualtru u linguagiu di i mudelli di SPIP, è permette di rializà appaginamenti assai svariati : sè vo ùn mi cridite, date puru un’uchjata à uZine, Vacarme, Hacktivist News Service, è à i siti arregistrati da i so creatori nant’à sta pàgina. Serebbe veramente peccatu di tene si l’appaginamentu d’urìgine, puru s’ellu hè assai ùtule da mette si e mani in pasta.
2. Si puderà scrive i so mudelli da per sè ?
Sicura, hè unu di l’interessi maiò di SPIP. Per ciò, andate puru à vede :
- u tuturiale, da capisce i fundamenti di a prugrammazione di i mudelli.
- u manuale di riferimentu, chì allistineghja tutte e pussibulità di prugrammazione.
3. Ùn sò / ùn vogliu micca amparà à prugrammà. Si puderà aduprà paginature digià pronte ?
Iè. Oltre a paginatura predefinita, sò dispunìbuli ancu altri ghjochi di mudelli nant’à u situ di cuntributi à SPIP, in rùbbrica «Mudelli».
Di règula basta à scaricà vi l’archiviu ch’avete sceltu (u schedariu di furmatu .zip o .tar.gz, cum’ella vi pare), di scumpressà vi lu ind’è voi, è di trasferisce ciò ch’ellu cuntene, cù FTP, à a ràdica di u vostru situ SPIP. Pudete fà una copia di salvezza di i vostri schedari .html attuali, in casumai chè vo avèssite à vultà in daretu.
4. Ùn ci n’hè tanti, mudelli dispunìbuli. Cumu serà?
Sò furniti sti ghjochi di mudelli da i webmaestri SPIP chì ci porghjenu e so creazioni. Di sicura cuntemu assai nant’à i webmaestri per arricchisce sta basa di mudelli, da favurizà aiutu è divizia in i siti SPIP. (cf. sezzione « sparte » più indà in sta FAQ)
Creà i so propri mudelli
1. Si pò aduprà qualchì editore di testu per creà è mudificà i so mudelli ?
Iè, quant’è ch’ellu fussi clàssicu HTML.
2. Si pò aduprà qualchì editore gràficu (WYSIWYG) per creà è mudificà i so mudelli ?
Iè, quant’è ch’ellu fussi clàssicu HTML. Ma fighjate quantunque a quistione quì sottu.
3. A mi provu à aduprà un editore gràficu da creà e mo pàgine, ma mi scambia i tags SPIP. Cumu possu fà ?
Certi editori gràfichi « curregenu » in autumàticu i tags ch’elli ùn capiscenu micca. Ma a maiò parte anu un’upzione da disattivà sta funziunalità. Emu cunsacratu un artìculu apposta à DreamWeaver, ma hè listessa via per l’altri editori (GoLive...).
Sparte e vostre creazioni
1. Aghju scrittu unepochi di mudelli per u mo situ. Avà, cosa devu fà da ch’elli sianu dispunìbuli à tutti ?
Iscrivite vi puru nant’à u situ SPIP-Contrib ammintatu più sopra, da prupone i vostri mudelli à u scaricamentu, di modu chì altra ghjente si ne pòssinu ghjuvà anch’elli per creà u so propriu situ.