1. Prima di tuttu, sviutà u cache
Per ùn salvà micca una mansa di schedari inùtuli, sviutate puru u cache di u vostru situ SPIP prima di lancià a copia di salvezza (sopratuttu sì u vostru situ hè assai visitatu).
Da sviutà u cache di u vostru situ, cunnettite vi puru da amministratore, è andate à a pàgina «Paràmetri > Sviutà u cache» di u spaziu privatu, è ùn vi scurdate micca di cliccà nant’à u buttone «Sviutà u cache». Vene tandu u messagiu «U cache hè viotu» da cunfirmà u fattu.
2. Salvà a basa di dati
A basa di dati hè u core di u vostru sistema d’infurmazione: u cuntenutu sanu sanu d’artìculi, dispacci, rùbbriche, autori è fori ci stà accumpulatu [1].
Per fà a salvezza di i vostri dati (vale à dì tutti i ducumenti quant’elli sò, fatti cù SPIP), andate puru à a pàgina «Salvà/risturà a basa» di u spaziu privatu, è sceglite u furmatu di cumpressione di a basa aggalabbatu.
Qualessa cumpressione sceglie ?
- In duie parulle: pruvate prima a salvezza cumpressata. In casumai ch’ella ùn viaghji quessa, sceglite a salvezza micca cumpressata.
- Spiegazioni: Vene cumpressatu un schedariu «dump.xml.gz» da risparmià u spaziu nant’à u discu è accurtà u so trasferimentu. Siccume hè un schedariu binariu, ferà inoltre di menu prublemi durante u trasferimentu da un urdinatore à l’altru. Invece, bisogna à avè qualchì arnese da scumpressà u .gz. Sè vo fate una salvezza micca cumpressata à l’usu «dump.xml», fate puru casu à a cunfigurazione ascii/bin di u cliente FTP.
Cliccate dopu nant’à u buttone «Salvà a basa di dati».
Smarra u prucedimentu d’autentificazione cù FTP :
A pàgina dopu vi indetta un cartulare è un nome da ricupià, à l’usu «admin_xxxxx». Cupiate puru stu nome, è smarrate u vostru prugrammu-cliente FTP. Aprite puru u vostru contu FTP chì currisponde à u vostru situ, è andate in u cartulare indettatu da sta pàgina (cù SPIP < 1.9 si chjamava ecrire/data, avà si chjama tmp, fora chè qualsìasi cunfigurazione speciale; ma pocu impremenu per voi sti cambiamenti di nome). Dentru à stu cartulare, create un nuvellu cartulare chjamatu cù u nome cupiatu anzora (vale à dì, à l’usu «admin_xxxxx»).
Creatu u cartulare, vultate à a pàgina di u vostru navigatore, è cliccate nant’à u buttone «ricaricà sta pàgina». Tandu vene lanciata a salvezza.
Sè vo vulete, pudete verificà in u vostru prugrammu FTP ch’ellu hè statu creatu u ducumentu «dump.xml»: hè a copia di u vostru situ. U pudete puru lascià nant’à u vostru contu FTP, o per maiò sicurezza, scaricà lu nant’à u vostru urdinatore.
Nota impurtante: Sta copia di salvezza hè da aduprà solu cù a versione cù chì hè stata creata. In casu di guai, pensate à nutà vi la o à scaricà issa versione SPIP per pudè ritruvà tuttu tale ch’ellu era nanzu. Demu lu torna stu cunsigliu, chì u prublemu accade abbastanza à spessu: dopu qualchì aghjurnamentu di versione SPIP, ùn turnate micca à stallà a basa di dati cù a copia fatta capunanzu in versione di SPIP più vechja. Nanzu usate puru sta copia per tramutà u vostru situ versu un SPIP di listessa versione.
Fà una copia di salvezza sana sana
S’ellu s’agisce d’un sèmplice aghjurnamentu di SPIP, ùn hè necessariu di salvà u vostru situ sanu sanu. Invece diventa indispensèvule sè vo vulete tramutà u vostru situ.
Per avè da veru una copia sana sana di u vostru situ, pensate puru à salvà dinò (cù FTP) :
- u vostru cartulare /IMG (è i so sottucartulari), chì cuntene tutte l’imàgini è i ducumenti alleati di u situ
- i vostri mudelli è tutta a robba cuntenuta in u vostru cartulare «mudelli»
- e vostre foglie di stile CSS mudificate è l’elementi d’appaginamentu gràficu
- i vostri scripts persunali (javascript o php)
- i vostri schedari persunalizati mes_options.php è mes_fonctions.php
- i cuntributi è plugins da voi stallati capunanzu è tutta a robba cuntenuta da u vostru cartulare «plugins»